Saudozu Ma’Huno Bulerek Karathayano (númeru daruak hosi liman-kuana) no Ma’Hudo Raan Kadalak (númeru dahuluk hosi liman-kuana) hasai retratu hamutuk ho José Luís Guterres no José Ramos Horta (númeru dahuluk-daruak hosi liman-karuk). Imajen/Espesiál

DILI, 26 setembru 2021 (TATOLI)—Líder boot rezisténsia, funu-na’in no eroi boot, António João Gomes da Costa ‘Ma’Huno Bulerek Karathayano’, nia dedikasaun no sakrifísiu lori Timor-Leste hadau nia ukun rasik-an liuhosi konsulta populár (referendu) iha tinan 1999.

Iha sesta ne’e, loron 24 setembru 2021, iha tuku 17:30, moris ne’e nia-na’in (Aman Lalehan) bolu hikas eroi boot ‘Ma’Huno Bulerek Karathayano’ ba Nai nia kadunan santu. Luta-na’in ne’e mate iha Hospital Nasional Guido Valadares (HNGV), tanba ataka-kurasaun (kardiovaskulár) no tanba moras stroke ne’ebé saudozu enfrenta hahú hosi 07 setembru 1999 to’o agora.

Notísia Relevante: Ma’huno Bulerek Karathayano hakotu-iis tanba ataka-kurasaun

Durante tinan 22, saudozu luta kontra moras stroke ne’e, maibé Maromak hadomi liu hodi bolu nia lalais ba Maromak Nia uma. Ninia luta, dedikasaun no sakrifísiu hela hanesan memória pasada ida-ne’ebé jerasaun foun sira sei konta tutan ba malu.

Foin-sa’e ida, Memensio Freitas, haktuir ninia memória hamutuk ho saudozu Ma’Huno iha loron lubuk ida-nia laran, hafoin Sekretáriu Nasaun Unida, Kofi Annan, anúnsia rezultadu konsluta populár iha 04 setembru 1999.

Saudozu Ma’huno Bulerek Karathayano moras no baixa hamutuk ho komandante Falur Rate Laek. Imajen/Espesiál.

Iha loron 06 setembru 1999, nia halai sa’e ba Dare atu salva-an. Bainhira nia la’o besik Dare, nia hetan komandante Ma’Huno Bulerek Karathayano hamutuk ho saudozu Apeu Kuluhun (Apeu Ikan Fafuluk), Eladio Faculto (eis deputadu FRETILIN), tanba Eladio no Apeu bolu nia, nia deside atu la’o ho Ma’huno.

Iha loron 07 setembru 1999 dadeersan, ho orientasaun hosi saudozu Ma’Huno Bulerek Karathayano, ami sai hosi Dare atu halo viajen ba Uaimori Tula tanba saudozu Ma’Huno iha ideia ruma atu ko’alia ho Komandu da Luta.

Maizumenus tuku 14.00 lorokraik, ami deskansa uitoan iha Kutulau nia okos mai, katuas Ma’Huno loke hela rádiu Olanda hodi rona notísia ne’ebé fó sai katak saudozu Ma’Hudo Raan Kadalak nia viajen ho timor-oan refujiadu barak bá Kupang, Indonézia, saudozu Ma’Huno monu dezmaia kedas iha fatin no la’o la di’ak.

Maun Peu Kulu-hun hodi kbiit kateu de’it saudozu Ma’Huno iha nia kotuk hodi hatoba tiha katuas iha ai-mahon ida-nia okos. Bainhira saudozu Ma’Hudo hadeer hikas mai, nia tanis ho matan-been.

“Ma’Hudo Raan Kadalak, ha’u hateten fila-fila ba ó atu ita rua sai ona hosi Dili, maibé ó la rona. Desta vez, ó kala sai duni vítima ba komandu da luta nia orientasaun,” Memensio Freitas haktuir memória pasada ne’e ba Agência Tatoli, domingu ne’e.  

Iha biban ne’e, sira deside la kontinua halo viajen ba Uaimori Tula. Kalan ne’e, sira toba de’it iha Kutulau (iha katuas Lourenço nia família ida-nia uma). Loron 08 setembru 1999 dadeer, sira deside fila mai Nahaek iha katuas Lourenço nia to’os laran.

Sira hela iha ne’ebá to’o International Force for East Timor (INTERFET) tama iha Dili. Loro-loron, sira han ai-farina, ai-dila, koto-moruk no selu-seluk tan hosi tiu Lourenço nia to’os-laran. Sira fahe malu loron-tolu, hafoin INTERFET kontrolu ona Dili laran.

Bainhira INTERFET tun ona iha Dili, tanba alin ida moras, nia (Memensio) tenke husu lisensa ba katuas Ma’Huno atu tun mai Dili. Iha momentu ne’e, katuas Ma’Huno Bulerek Karathayano, foti osan iha bolsu laran ho montante Rp 50.000/$5) no lolo ba nia.  

“Uza osan ne’e hodi hola labarik nia sasán ka ai-moruk, tanba ó-nia aman Soekarno seidauk bele mai villa, nia sei iha lai Uaimori Tula,” Memensio Freitas hateten hodi hasara tuir lia-tatoli ne’ebé saudozu Ma’Huno hameno hela ba nia.

Saudozu Ma’huno Bulerek Karathayano (klaran) hamutuk ho atuál Primeiru-Ministru Taur Matan Ruak no Komodoro Donaciano Costa Gomes Pedro ‘Klamar Fuik’. Imajen/Espesiál

Liu tiha loron ruma, tanba moras stroke ne’e, bainhira nia ba haree katuas Ma’Huno baixa iha ‘Muzeu Dili’ (atuál Arte Moris) hamutuk ho komandante Falur Rate Laek, saudozu Ma’Huno hatudu hamnasa midar de’it.

Liu tiha ida-ne’e, bainhira nia hasoru fali saudozu Ma’Huno iha uma Quintal-kiik, katuas Ma’Huno Bulerek Karathayano hatudu oin-midar ho hamnasa mihis de’it.

Notísia Relevante: Timor-Leste lakon tan asua’in espesiál Ma’Huno Bulerek Karathayano

“Biar ha’u moras no Ma’Hudo Raan Kadalak lakon ona, maibé Timor-Leste ukun-an ona,” Memensio Freitas haktuir.

Antes ne’e, reprezentante Forca Armada Libertação Nacional Timor Leste (FALINTIL) ba implementasan Konsulta Populár 1999 iha Komisi Perdamaian da Stabilitas (KPS) ka Komisaun Pás no Estabilidade, Vidal de Jesus “Riak Leman”, informa reprezentante FALINTIL iha KPS asegura implementasaun Konsulta Populár (referendu 1999) iha Sidadade Dili to’o anunsia rezultadu votasaun Konsulta popular iha loron 04 setembru 1999.

Riak Leman hatutan, iha momentu kruel ne’e, nia konsege fó hanoin ba Saudozu Ma’Hudo Raan Kadalak atu sira na’i-rua (2) sees-an hosi Dili hodi salva-an tanba inimigu sira atu oho reprezentante FALINTIL ne’ebé servisu iha Komisi Perdamaian dan Stabilitas (KPS), maibé Ma’Hudo la tau ba konsiderasaun tanba nia hetan ona kontaktu hosi komandante TNI (Tentara Nasionál Imdonesia) ida atu ba hasoru Jenerál Wiranto.

“Irmaun Ma’Hudo Raan Kadalak, komandante TNI ida naran Joko kontaktu nia dehan Wiranto mai atu ba hasoru. Entaun Ma’Hudo dehan ba ha’u, ita ba hasoru Jenerál Wiranto. Ha’u dehan lae, agora inimigu atu oho ita mak nia tiru ona ita ne’e. Di’ak liu ita lalika ba hasoru. Ita sees-aan ona. Maibé Ma’Hudo dehan; ‘Se ha’u husik KPS mak Indonézia bele ho razaun ida-ne’e boikota referendu. Ida ne’e estratejiku ikus liu atu salva referendu no asegura estratejia implementa referendu depois povu Timor reafirma ukun rasik an husi referendu’. Maibé to’o ikus Ma’Hudo mak ba hasoru ka la hasoru mak ne’e, ba iha-ne’ebá ema kala kaer nia, hodi lori lakon ka oho tiha to’o agora ne’e,” Riak Leman hateten.

Biografia

José António Gomes da Costa ‘Ma’Huno Bulerek Karathayano’, moris iha 14 abríl 1949. Saudozu nu’udar antigu Komandante FALINTIL, antigu Sekretáriu Komisaun Diretiva FRETILIN no atuál Primeiru Vise-Prezidente Partidu CNRT.

Ma’Huno Bulerek Karathayano, hanesan mós Komandante FALINTIL ida-ne’ebé la’o hamutuk Komandante ein Xefe, Kay Rala Xanana Gusmão, dezde 1975 to’o 1999.

Saudozu Ma’Huno nu’udar membru Komité Sentrál FRETILIN (CCF, sigla portugés) iha tinan 1975 no nu’udar úniku elementu CCF hamutuk ho Xanana Gusmão no Fernando Txai, mak hasoru malu atu reorganiza filafali funu hafoin Matebian rahun iha serku anikilamentu hosi forsa okupasaun Indonézia.

Iha Konferénsia Nasionál Maubai, Viqueque, iha loron 03 marsu 1981, Saudozu Ma’Huno hetan nomeasaun nu’udar Komisáriu Polítiku ba Rejiaun Haksolok.

Iha Konferénsia Nasionál FRETILIN nian ne’ebé hala’o iha Maubai, Viqueque, ho orientasaun hosi membru CCF, sobrevivente rua, Xanana Gusmão no Ma’Huno, konfresista sira hili membru CCF na’in-sia foun tan hodi foti desizaun importante lubuk ida, hodi reorganiza Timor-Leste nia luta libertasaun nasionál iha territóriu tomak. Rezisténsia Armada (FALINTIL) moris filafali iha ai-laran, povu Timor-Leste hetan fali nia esperansa no halo mundu hakfodak.

Iha 1988, saudozu Ma’Huno hetan nomeasaun ba Konselleiru Militár no iha tinan 1990 nu’udar Sekretáriu Komisaun Diretiva FRETILIN nian.

Hafoin Xanana Gusmão hetan kapturasaun iha tinan 1992, Saudozu Ma’Huno asume líder rezisténsia nian nu’udar susesór naturál hodi kaer Komandu luta iha loron 05 marsu 1993 hodi kontinua funu.

Maibé, inimigu Indonézia kaptura saudozu Ma’Huno iha Rejiaun Ainaro iha abríl 1993,  no tenke simu kastigu iha kadeia.

Maski iha kadeia laran, maibé la hamate saudozu Ma’Huno nia espíritu nasionalizta hodi kontribui ba luta libertasaun nasionál.

Iha villa laran saudozu, Ma’Huno serbisu hamutuk ho Ma’Hudo Raan Kadalak, hodi kontinua mobiliza juventude sira iha luta hasoru okupasaun Indonézia. Ma’Huno esforsa ba hametin rezisténsia iha zona okupada, nune’e kontribui ba luta klandestina, ne’ebé sai mós frente prinsipál ida ba Timor-Leste nia independénsia.

Iha sesta (24/09), saudozu Ma’Huno Bulerek Karathayano nu’udar jerasaun fundadór hakotu ona iis no hakmatek iha Maromak nia uma. Rai no povu Timor-Leste triste tanba lakon líder no eroi boot ida. 

Maibé, hein katak timor-oan sira liu-liu jerasaun tuan no jerasaun foun sira sei la haluha katak Saudozu Ma’Huno nia memória ba rai-lulik no povu Timor-Leste livre no independente, tanba Ma’Huno nia obra sei hela rohan-laek bainhira valór no prinsípiu luta nian kontinua buras hamutuk ho timor-oan no kontinua ‘moris’ iha timor-oan sira-nia moris loro-loron.

Jornalista : Cancio Ximenes

Editora    : Julia Chatarina

HAKEREK NO HATÁN

Please enter your comment!
Please enter your name here