José António Gomes da Costa ‘Ma’Huno Bulerek Karathayano’. Imajen TATOLI/Eugénio Pereira

DILI, 24 setembru 2021 (TATOLI)—Funu na’in, José António Gomes da Costa ‘Ma’huno Bulerek Karathayano’ hakotu-iis iha Ospitál Nasionál Guido Valadares (HNGV sígla portugés), iha sesta (24/09) tuku 17:30 otl, tanba ataka-kurasaun (kardiovaskulár).

Informasaun ne’ebé Agência Tatoli asesu iha HNGV no parte família katak, durante ne’e matebian sofre moras komplikasaun.

Notísia relevante:Iha 3 Marsu 1981, Xanana-Ma’Huno Orienta Reorganiza Luta

Matebian mós foin lalais ne’e pozitivu COVID-19 no hala’o tratamentu iha izolamentu Vera Crus, no rekopera hodi  fila ba uma, maibé hetan atakasun família transporta ba halo tratamentu iha sala Unidade Kuidadu Intesivu  (ICU sígla iglés), HNGV  iha domingu 19 setembru 2021, to’o hakotu-iis.

Oras ne’e daudaun, família transporta ona mate-isin hosi HNGV ba rezidénsia iha Praia dos Coqueiros, Díli, atu bele prepara ba serimónia funerál tuir desizaun Estadu.

Ma’huno Bulerek Karathayano, moris iha 14 abríl 1949, hanesan mós Komandante FALINTIL ida ne’ebé la’o hamutuk Komandante Em-Xefe, Kay Rala Xanana Gusmão, dezde 1975 to’o 1999.

Iha 1987, Ma’Huno assume kargu hanesan Sekretáriu Komité Ezekutivu FRETILIN, hafoin Xanana Gusmão lori FALINTIL sai hosi FRETILIN hodi harii Congreso Nacional Resistência Maubere (CNRM) nu’udár organizasaun rezisténsia Timor-nian iha 1988.

Iha maiu 1990, Ma’huno hetan fiar nu’udár Sekretáriu Jerál FRETILIN bainhira Xanana Gusmão hetan kapturasaun iha novembru 1992 hosi forsa Indonézia, Ma’huno asume hikas kargu nu’udár Komandante FALINTIL to’o 05 abríl 1993.

Bainhira hetan kapturasaun iha Díli, iha fulan barak nia laran Ma’huno  hetan torturasaun hosi militár Indonézia  to’o livre iha 1995.

Hahú iha 2013, Ma’huno Bulerek Karathayano, envolve iha partidu Congresso Nacional Reconstrução Timorense (CNRT) lidera hosi Kay Rala Xanana Gusmão no iha 2017, eleitu nu’udár Vise-Prezidente.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here