Ministru Obra Públika, Salvador Eugênio dos Reis Pires. Imajen TATOLI/Francisco Sony

DILI, 24 setembru 2021 (TATOLI)-Ministru Obra Públika, Salvador Eugênio dos Reis Pires, delega ona kompeténsia ba Vise-Ministru Obra Públika, Nicolau Lino Freitas Belo, hodi asina projetu sira ne’ebé ho montante millaun $1 mai kraik, relasiona ho rekuperasaun infraestrutura ne’ebé estraga tanba inundasaun iha loron 04 abríl.

“Agora atu tama ona kontratu ho empreza sira no iha hela prosesu aprovizionamentu ba lokál haat hanesan Bidau, Tibar, moru sustentasaun Maloa, ponte kiik-oan ida iha Ailok-Laran no seluk sei iha prosesu preparativu,” Ministru Salvador hateten ba Agência TATOLI, iha ninia knaar fatin, Caicoli, sesta ne’e.

Nune’e, iha loron 20 setembru, Vise-Ministru Obra Públika selebra ona kontratu ho kompañia haat hodi implementa projetu emerjénsia.

Kompañia haat ne’e kompostu hosi, Empreza Sali Magu Unipessoal, Lda, halo konstrusaun ba moru protesaun ba mota Tibar, Santana Diak Unipessoal, Lda, halo konstrusaun ba moru protesaun iha mota Bidau ka Toko Baru, Holgapa, Lda,  halo konstrusaun ba moru protesaun mota Maloa (Concrete Retaining Wall Protection of Maloa River) no Chegue-rau, Lg, Lda, halo konstrusaun foun ba box culvert iha Ailok-laran.

Aleinde ne’e, Ministru mós delega kompeténsia ba Vise-Ministru reprezenta partisipasaun iha reuniaun Konsellu Administrasaun Fundu Infraestrutura (KAFI).

Kona-ba prosesu konstrusaun ba ponte Bekusi foun, Ministru dehan, prosesu dezeñu detalladu la’o hela no agora Ajénsia Dezenvolvimentu Nasionál (ADN) halo hela verifikasaun.

 “Iha semana rua ka tolu liubá, ami simu ona agora atu tama kontratasaun, espera katak semana oin ami bele aprezenta ona nia dezeñu konsepsuál, nune’e outubru bele lori ba KAFI atu halo aprovasaun no halo konkursu hodi halo ponte Bekusi foun,” nia akresenta.

Notísia relevante: MOP prepara ona dezeñu ponte foun, hafoin sobu ponte Bekusi

Nune’e mós, MOP simu ona relatóriu hosi ekipa task force ba lokalizasaun estragu infraestrutura kauza dezastre naturál iha 04 abríl hamutuk 94, ne’ebé hatudu iha estrutura simples estragu pur volta lokál 54 no 40 resin ne’e estrutura komplexu.

MOP halo ona preparativu hamutuk ho ekipa task force hodi halo dezeñu detalladu hodi rekupera.

“Ha’u deside halo tan rekrutamentu no deside halo despaxu ida tan atu akumula enjeñeiru sira iha Ministériu Obra Públika rasik, no mós halo tan rekrutamentu ba enjeñeiru  tékniku sira atu ajuda hodi prodús planeamentu ba mitiga estragu sira ne’ebé mak akontese iha 04 abríl,” nia hatutan.

Notísia relevante: Benjamin de Oliveira lidera komisaun tékniku planu rekonstrusaun

Primeiru-Ministru, Taur Matan Ruak, antes ne’e estabelese ekipa kona-ba prosesu rekuperasaun estrada no ponte ne’ebé hetan estragu hosi kalamidade foin lalais, ne’ebé lidera hosi Benjamin de Oliveira Hopffer Silveira Martins.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here