Kondisaun ponte Bekusi ne’ebé mota sobu durante inundasaun iha kapitál Dili. Imajen TATOLI/António Gonçalves

DILI, 08 abríl 2021 (TATOLI)-Ministru Obra Públika (MOP), Salvador Eugênio Soares dos Reis Pires, hateten  ekipa Diresaun Jerál Obra Públika no Ajénsia Dezenvolvimentu Nasionál (ADN) prepara oan dezeñu hafoin bele sobu ponte Bekusi.

“Tuir instrusaun hosi Primeiru-Ministru, sobu ponte Bekusi, maibé ita sei halo hela dezeñu atu sobu karik bele halo foun atubele troka,” Ministru Salvador hateten iha Pálasiu Governu, kinta ne’e.

Notísia relevante: PM orienta MPO-MOP sobu ponte Bekusi no harii foun

Xefe Governu rasik konkorda halo dezeñu ponte foun molok sobu ponte Bekusi ne’e.

“Ita seiduak bele sobu tanba agora sei udan hela no ita tenke iha solusaun ida molok ita sobu. Ita hakarak sobu kedan tenke mai ho konstrusaun foun atu ita labele sobu no husik hela,” nia akresenta.

Nia dehan, pakote ne’e mós sei tama ho indentifikasaun no kuantifikasaun dadus ne’ebé daudaun realiza hosi task force.

Antes ne’e, Primeiru-Ministru fó orientasaun ba Vise Primeiru-Ministru no Ministru Planu Ordenamentu, José Reis no Ministru Obra Públiku, atu sobu ponte Bekusi no konstrui foun, nune’e labele fó impaktu negative ba populasaun ne’ebé hela besik mota bainhira akontese inundasaun.

Ponte Bekusi harii iha loron 15 novembru 2016 no ramata iha loron 31 jullu 2018 ho kustu hamutuk $674.456,62.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here