Primeiru-Ministru, Taur Matan Ruak, konvoka enkontru ho Benjamin de Oliveira Hopfer Silveira Martins, iha Palásiu Governu. Imajen/GPM

DILI, 16 abríl 2021 (TATOLI)Primeiru-Ministru (PM), Taur Matan Ruak, deside nomea Benjamin de Oliveira Hopfer Silveira Martins, lidera komisaun tékniku ba planu rekonstrusaun ligadu ho dezastre naturál ne’ebé akontese foin lalais hodi estraga hela fatin populasaun no infraestrutura públiku sira.

Iha segunda ne’e, Xefe Governu bolu Benjamin de Oliveira, ba ninia gabinete iha Palásiu Governu, hodi fó instrusaun serbisu halo jestaun ba komisaun tékniku ne’ebé Governu kria atu halo planu no estratejia ba planu rekonstrusaun pós inundasaun 04 abríl, ne’ebé kuaze estraga infraestrutura públika iha kapitál Dili no munisípiu hotu.

“Komisaun tékniku sei halo levantamentu, prepara konseitu no dezeñu, ho supervizaun hosi Vise Primeiru-Ministru no Ministru Planu Ordenamentu, Jose Maria dos Reis,” relata nota ne’ebé Agência TATOLI asesu, sesta ne’e.

Entretantu, komisaun tékniku ne’e sei envolve tékniku hosi Ministériu Obra Públika (MOP),  Ministériu Planu Ordenamentu (MPO), Ajénsia Dezenvolvimentu Nasionál (ADN) no Konsellu Administrasaun Fundu Infraestrutura (KAFI).

Benjamin de Oliveira nu’udar dosente senior iha Departamentu Enjeñaria Sivíl hosi Fakuldade Enjeñaria, Siénsia no Teknolojia, Universidade Nasionál Timor Lorosa’e (UNTL).

Inundasaun iha domingu (04/04) afeta ba família  hamutuk 25.000 iha territóriu tomak no hela-fatin 4.546 maka a’at durante dezastre naturál.

Enkuantu, iha nível infraestrutura públika sira estrada 22 no ponte 11 mak estraga.

Iha Dili, daudaun ne’e ema 11.104 maka hela iha sentru evakuasaun provizóriu 38 no família hamutuk 8.548 mak afeta inundasaun iha sidade Dili.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here