Ministru Obra Públika (MOP), Salvador Eugênio Soares dos Reis Pires. Imajen TATOLI/Francisco Sony

DILI, 22 setembru 2021 (TATOLI)-Ministru Obra Públika (MOP), Salvador Eugênio Soares dos Reis Pires, orienta ekipa Institutu Jestaun Ekipamentu, Institutu Públika  (IGE, I.P, sigla portugés) atu kontinua identifika no normaliza simultaneamente mota iha kapitál atu evita inundasaun bainhira akontese udan-boot.

“Ha’u fó orientasaun ba IGE atu kontinua halo identifikasaun ba mota risku inundasaun atubele halo normalizasaun no hasai sedimentasaun, nune’e bainhira akontese udan-boot labele fó risku ba populasaun,” Ministru Salvador hateten, iha Palásiu Governu, kuarta ne’e.

Tuir Ministru, IGE hahú atividade ona iha mota sira ne’ebé identifikadu risku ba inundasaun hanesan ponte Becusi, Maloa, ponte My Friend no seluk tan iha kapitál Dili.

“Ita husu IGE atu antisipadamente prepara ekipamentu pezadu iha mota no hahú servisu serbisu tanba daudaun hahú udan,” governante ne’e akresenta.

Notísia relevante: IGE finaliza normalizasaun estragu iha munisípiu afetadu dezastre naturál

Aleinde ne’e, Komisaun Nasionál Aprovizionamentu (CNA, sigla protugés) hahú loke konkursu públiku atu halo rekuperasaun ba infraestrutura iha fatin lima ne’ebé hetan estragu tanba dezastre naturál ne’ebé akontese iha loron 04 abríl.

Projetu iha área lima kompostu hosi ponte no estrada bá Maloa, estrada Ailok-laran bá RTK, estrada iha Hospital Nacional Guido Valadares (HNGV) nia kotuk no estrada ligasaun Tibar bá Ermera inklui Ponte Becusi, Becora.

Ekipa Task force finaliza ona dezeñu detalladu ba estrada iha ponte CPLP  bá Bebonuk, maibé sei aprezenta tan ba Komisaun Administrasaun Fundu Infraestrutura (KAFI) atu aprova hafoin CNA loke kokursu.

Iha sorin seluk, Prezidente  Konsellu Administrasaun IGE, I.P, Ermenegilda da Costa Laurentina, informa, serbisu normalizasaun ba mota sira iha kapitál Dili hahú la’o, hosi Ai-tahan Belar no mota ulun Maloa nian inklui mota ne’ebé sai  área risku seluk.

Institutu ne’e mobiliza ekipamentu iha munisípiu-sira hodi mai apoiu iha Dili no kontinua destaka ekipamentu balun iha munisípiu atu kontinua apoiu normalizasaun.

“Daudaun ne’e, ekipa IGE hahú normalizasaun hasai sedimentasaun iha mota ne’ebé iha área risku ba inundasaun, nune’e bainhira udan-boot akontese labele estraga komunidade sira-nia hela fatin,” nia hatutan.

Notísia relevante: Atensaun, Timor-Leste tama iha senáriu ameasa ‘’La Nina’’

Tuir Ermenegilda, IGE serbisu hamutuk ho parseiru internasionál hanesan Peace Winds Japan, ne’ebé apoiu Exca PC 200 unidade ida no Dump Truck unidade lima no empreza nasionál balun mós apoiu halo normalizasaun no hasai sedimentasaun.

Antes ne’e, iha ona alerta hosi meteorolojia Austrália no internasionál hanesan Global ENSO Analysis Cell, katak Timor-Leste sai hanesan nasaun ida ne’ebé hetan impaktu boot hosi fenómenu La Niña.

Fenómenu La Niña nu’udar eventu klimátika ida ho kondisaun anomalia ho temperatura laloran tasi boot iha oseanu pasífiku no aumenta mudansa iha sirkulasaun atmósfera anin no udan boot.

Jornalista : Florêncio Miranda Ximenes

Editora      : Julia Chatarina

HAKEREK NO HATÁN

Please enter your comment!
Please enter your name here