Prezidente Konsellu Administrasaun IGE, Ermenegilda da Costa Laurentina. Imajen TATOLI/Egas Cristóvão

DILI, 03 maiu 2021 (TATOLI)-Institutu Jestaun Ekipamentu, Institutu Públiku (IGE,I.P, sigla portugés) finaliza ona normalizasaun estragu sira iha munisípiu afetadu dezastre naturál ne’ebé akontese iha domingu (04/04).

“Ami finaliza ona atividade normalizasaun no limpeza jerál iha estrada no uma iha Dili no munisípiu sira ne’ebé hetan impaktu maka’as no risku inundasaun,” Prezidente Konsellu Administrasaun IGE, Ermenegilda da Costa Laurentina, hateten ba Agêcia TATOLI, hafoin ramata reuniaun Konsellu Administrasaun Fundu Infraestrutura (KAFI), iha edifisíu Ministériu Finansa, Aitarak-Laran, segunda ne’e.

Daudaun ne’e, IGE mantein atividade iha área haat  iha kapitál Dili hanesan Mota Bekusi, Metiaut, Palásiu Prezidente nia areadór kotuk no mota Saboli-Metinaro.

“Iha Kapitál Dili, ami responsabiliza iha lokál 36, ne’ebé lokál 32 mak finaliza ona, maibé ami kontinua mantein iha fatin haat no agora simu pedidu foun halo apoiu emerjénsia ba komunidade sira,” nia akresenta.

Nune’e mós, IGE normaliza ona estrada kotu iha munisípiu Aileu-Remexio-Aileu, daudaun finaliza ona no movimentu transporte hahú la’o normál.

“Ami-nia ekipamentu mak limitadu, tanba ne’e to’o semana rua mak ekipamentu IGE foin to’o, maibé daudaun serbisu loron tolu ona no progresu di’ak, espera katak tempu badak bele finaliza no kontinua ba munisípiu seluk,” Responsável ne’e hatutan.

Aleinde ne’e, institutu  mós aterru ona estrada kotu iha Laclubar-Manatuto no kontinua halo normalizasaun mota sira iha área refere, ne’ebé movimentu transporte hahú la’o di’ak.

IGE mós halo normalizasaun  iha mota iha Alas-Same, Natabora, Lautem, Bobonaro hanesan Ponte Bilau-Bobonaro, Ponte Leimia-Cowalima.

“Ami aterru ona no komunidade bele asesu ho movimentasaun transporte privadu no públiku,” Prezidente IGE tenik.

IGE kontinua simu pedidu hosi munisípiu sira atu halo apoiu normalizasaun no loke estrada foun sira, maibé sei foku liu ba normalizasaun.

Atividade normalizasaun  ne’e hetan apoiu mós hosi empreza hamutuk 20-resin, ne’ebé apoiu atividade iha lokál 50-resin.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here