Membru Unidade Polísia Fronteira (UPF) no FALINTIL-Forsa Defeza Timor-Leste (F-FDTL) blokea estrada iha área Postu Administrativu Tilomar hodi evita abitante sira halo viajen hosi Covalim (Suai) ba Fatumea. Imajen Tatoli/Eugénio Pereira.

DILI, 20 setembru 2021 (TATOLI)–Reprezentante Povu iha uma fukun Parlamentu Nasionál husu VIII Governu Konstitusionál atu aselera pagamentu ba ekipa liña frente sira-ne’ebé dedika-aan iha vijénsia COVID-19.

Notísia Relevante:  MAPKOMS prepara baze legál suplementu remuneratóriu ba jornalista liña frente

Deputadu Bankada FRETILIN, Alexandrino da Cruz Cardoso, ejize Governu aselera pagamentu ne’e ba ekipa liña frente sira tanba atu besik fulan-sia (9) ona maibé seidauk halo prosesu ba pagamentu ne’e.

“Durante resesu, ha’u rona informasaun barak hosi ekipa liña frente sira kompostu hosi PNTL, F-FDTL, ita-nia pesoál saúde sira no liña frente sira seluk katak, to’o ohin loron seidauk hetan direitu subsídiu ne’e. Osan ita aprova tiha ona, Prezidente Repúblika promulga tiha ona, Governu serbisu halo nusá mak ema-nia direitu ne’e fulan hitu no ualu ona maibé to’o ohin seidauk simu ne’e,” Deputadu Bankada FRETILIN ne’e levanta liuhosi plenária, segunda ne’e.

Entretantu Deputada Bankada FRETILIN, Helena Martins Belo, husu Governu tenke halo pagamentu ba ekipa liña frente sira, nune’e ekipa liña frente sira bele hala’o serbisu ho di’ak iha terrenu.

Notísia Relevante: Governu aprova suplementu remuneratóriu ba linã frente $5-$25 kada loron

“Governu tenke aselera ona pagamentu ba lina frente sira tanba, nu’udar reprezentante povu, kada loron ita simu hela de’it telefone,” Helena Martins Belo hateten.

Xefe Bankada KHUNTO, Deputadu Olinda Guterres preokupa ho pagamentu ne’e tanba to’o ohin loron Governu seidauk prosesa.

“Liña frente, ezemplu hanesan membru PNTL ne’e, sira husik hela sira-nia feen, oan no família hodi ba iha fronteira hodi halo serbisu, tanbasá mak Governu la hanoin ida-ne’e. Governu tenke aselera ona subsídiu ba liña frente ne’e,” nia husu.

Notísia Relevante: MD submete naran membru F-FDTL liña frente 300-resin ba MF

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here