Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (04/08). Imajen TATOLI/Egas Cristóvão

DILI, 04 agostu 2021 (TATOLI)–Governu liuhosi reuniaun Konsellu Ministru (KM), iha kuarta ne’e, aprova ona alterasaun daruak ba Dekretu-Lei númeru 17/2020, loron 30 abríl, ne’ebé kria suplementu remuneratóriu ba funsionáriu, ajente no traballadór administrasaun públika sira ne’ebé halo atividade profisionál oin-oin iha servisu prevensaun ka kontrola COVID-19 iha kondisaun direta.

“Valór suplementu remuneratóriu ida-ne’e, sei finansia hosi fundu COVID-19, ne’ebé ho variasaun entre $5 to’o $25 kada loron, tuir grau risku sira ne’ebé funsionáriu sira hasoru no tabela ne’ebé aprova ho diploma ida-ne’e,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.

Notísia relevante: Suplementu remuneratóriu, Governu sei submete hikas dekretu-lei ba Prezidente Repúblika

Portavóz Governu esplika, alterasaun ne’e hatuur lista kategoria traballadór benefisiáriu sira ne’ebé sei revee filafali tanba kategoria iha Dekretu-Lei antes ne’e ho definisiaun luan tebes.

“Liuliu ho inkluzaun hosi tékniku sira ne’ebé envolve ona iha programa vasinasaun kontra COVID-19 hanesan guarda prizionál no tékniku seluk tan, ne’ebé maka la abranje to’o oras ne’e,” Ministru akresenta.

Enkuantu, alterasaun ne’ebé prevee iha diploma ne’e sei prodúz efeitu hahú husi loron 30 abríl 2020.

Direitu ba suplementu sei prolonga to’o loron 31 dezembru 2021, sein prejuizu ba posibilidade posteriór hodi halo estensaun liuhosi intervensaun lejizlativa foun.

Antes ne’e, iha tinan kotuk Governu estabelese ona suplementu remuneratóriu ba traballadór elijível ba servisu prevensaun no kontrolu COVID-19 hanesan médiku, forsa, polísia, tékniku eletrisidade, jornalista no seluk tan, ho remunerasaun la hanesan, depende risku servisu ne’e rasik.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here