Ofisiál F-FDTL bainhira partsipa iha aniversariu FALINTIL ba dala-46 iha Kuartél Jerál F-FDTL Fatuhada, Dili, sesta (20/8/2021). Imajen Tatoli/Antonio Gonçalves.

DILI, 01 setembru 2021 (TATOLI)—Ministru Defeza (MD), Filomeno da Paixão de Jesus, submete ona lista  naran membru FALINTIL Forsa Defeza Timor-Leste (F-FDTL), na’in 300-resin ne’ebé serbisu direta ba prevensaun COVID-19, ba Ministériu Finansa (MF), atu prosesa hodi hetan suplementu remuneratóriu.

“Ita submete ona membru ne’ebé destaka iha postu fronteira no mós balun iha Liquiça ho Ainaro hamutuk 300-resin ba iha Ministériu Finansa,” Filomeno da Paixão de Jesus, hateten ba jornalista-sira iha edifísiu Ministériu Finansa, Aitarak Laran, kuarta ne’e.

Notísia relevante:MF simu lista liña frente instituisaun rua ba suplementu remuneratóriu

Bazeia ba dekretu lei ne’ebé Prezidente Repúblika (PR) promulga ona, Governu sei selu liña frente sira hahú fulan-marsu to’o 31 dezembru 2021.

PR promulga ona alterasaun daruak ba dekretu lei suplementu remuneratóriu ba liña frente ne’ebé hala’o atividade profisionál iha situasaun pandemia COVID-19, ne’ebé pagamentu hahú iha marsu to’o dezenbru 2021, bainhira Orsamentu Jerál Estadu (OJE) 2021 remata, karik presiza hatutan suplementu ne’e ba tinan 2022, presiza fali dekretu-lei foun ida.

Dekretu lei kona-bá suplementu renumeratóriu define profisionál elejível ba direitu hetan direitu maka médiku, enfermeriu, auxiliár ba asaun médika, parteira sira, tékkniku analiza laboratóriu, tékniku saúde públika, tékniku radiolojia, sira-ne’ebé ezerse funsaun iha Sala Situasaun Sentru Integradu Jestaun Krize (SIJK), motorista veíkulu, responsavel sira ne’ebé  lori ema ba izolamentu obrigatóriu, elementu PNTL no F-FDTL ne’ebé envolve iha prevensaun no kontrolu COVID-19.

Nune’e mós traballadór-sira iha Autoridade de Inspesaun no Fiskalizasaun Atividade  Ekonómika Sanitária no Alimentár (AIFAESA), Diresaun Nasionál Kuarentena no Bioseguransa, Serbisu Imigrasaun no Autoridade Aduaneira, Servisu Nasionál Intelejénsia, Diresaun Nasionál  Seguransa Patrimóniu Públiku, no servisu autoridade ka administrasaun munisipál, responsavel ba halibur lori no soe  lixu, sira-ne’ebé hola parte servisu autoridade ka administrasaun munisipál, serbisu munisipál fornesimentu bee moos, koveiru-sira no sira-ne’ebé integra iha ekipa ne’ebé hala’o serbisu  iha Rejiaun Administrativa Espesiál Oé-cusse Ambeno (RAEOA).

Antes ne’e, Prezidente Repúblika promulga dekretu lei númeru 17/2020 loron 30 abríl hodi fó direitu ba traballadór liña frente, atu ida-idak simu mós suplementu remuneratóriu ida, ho efeitu hosi marsu 2020, maibé iha fulan setembru 2020, dekretu lei ne’e hetan alterasaun dahuluk.

Nune’e, ho alterasaun  daruak ba dekretu lei ne’e aumenta tan profisionál sira ne’ebé iha direitu ba hetan suplementu remuneratóriu ne’e hanesan tékniku sira ne’ebé partisipa  iha programa vasinasaun kontra COVID-19, guarda prizionál, sira-ne’ebé serbisu protesaun sivíl, inklui bonbeiru no traballadór sira seluk ne’ebé hala’o serbisu iha sentru izolamentu, profilátiku ka terapéutiku no sira-ne’ebé  kuida pasiente COVID-19 sira hanesan tau matan ba seguransa no serbisu limpeza  no sira ne’ebé halo jestaun lixu.

Ho alterasaun ne’e,traballadór sira-ne’ebé serbisu iha administrasaun direta ka indireta Estadu no hala’o kna’ar iha risku nia laran relasiona ho COVID-19 hosi marsu 2020, bainhira hatudu prova dokumentál, iha diretu atu hetan pagamentu suplementu remuneratóriu ba kada loron serbisu efetivu ne’ebé halo ona, no ida-ne’e ho objetivu atu proteje diretu adkiridu hosi traballadór sira iha liña frente.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here