Prezidente Komisaun B (Negósiu Estranjeiru, Defeza no Seguransa), José Agostinho Sequeira ‘Somotxo’, Imajen/Dok.Tatoli

DILI, 14 setembru 2021 (TATOLI)–Reprezentante Povu sira iha Parlamentu Nasionál durante periódu resesu iha fulan-rua ne’e, atualiza situasaun polítika atuál ba povu liu-liu medida prevensaun hasoru pandemia COVID-19 no ezekusaun Orsamentu Jerál Estadu.

Notísia Relevante: Deputada Maria Angelina sei prezide abertura sesaun lejizlativa foun

“Ami halo kontaktu eleitorál ho militante sira, liu-liu atualiza situasaun polítika atuál hasoru pandemia COVID-19 no ezekusaun Orsamentu Jerál Estadu nian. Informasaun ne’ebé ami hato’o ba povu mak pro no kontra kona-ba pandemia ne’e, tanba ita-nia realidade atuál mak ne’e, laiha mós dehan iha no iha mós iha nafatin,” Membru Parlamentu Nasionál, Deputadu José Agostinho Siqueira ‘Somotxo’ informa ba jornalista sira, iha uma fukun tersa ne’e.

Prezidente Komisaun B ne’ebé trata asuntu Negósiu Estranjeiru, Defeza no Seguransa ne’e hateten, deputadu sira tenta konvense populasaun sira atu ba simu vasina no tenke kumpre nafatin protokolu COVID-19 nian.

Iha fatin hanesan, Deputadu Domingos de Carvalho, haktuir durante resesu foka ba konferénsia sub-munisipál, atividade konsolidasaun partidu nian tanba lakleur tán tama ba konferénsia munisipál.

“Atu hateten de’it, ami sira-ne’ebé iha Komisaun Permanente dalaruma sempre marka prezensa iha parlamentu. Durante resesu ne’e ami identifika preokupasaun povu nian barak tebes ne’ebé laiha relasaun ho partidu,” nia dehan.

Nia dehan, freprezenta partidu tún ba baze maibé ko’alia ho povu ne’e foka ba interese Estadu nian.

“Povu hameno mai ami mak ne’e, tenke levanta iha plenária kona-ba kondisaun estrada no laiha bee-moos no eletrisidade la tama,” nia dehan.

Deputadu sira hahú resesu iha loron 31 jullu no termina iha loron 14 setembru, no iha 15 setembru 2021 ne’e hahú sesaun lejizlativa foun.

Notísia Relevante: Aban, PN hahú resesu

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here