DILI, 13 setembru 2021 (TATOLI)–Prezidente Parlamentu Nasionál Ein-Ezersísiu atuál Vise-Prezidente Parlamentu Nasionál, Deputada Maria Angelina Lopes Sarmento, sei prezide sesaun lejizlativa foun iha 15 setembru.
Deputada Maria Angelina Lopes hala’o kna’ar ida-ne’e tanba Prezidente Parlamentu Nasionál iha hela rai-li’ur no fila mai tenke submete ba kuarenta tuir lei autorizasaun estadu emerjénsia nian.
Notísia Relevante: 14 setembru, loron ikus resesu ba deputadu sira
“Sesaun lejizlativa datoluk sei termina iha loron 14 setembru, no 15 setembru ita tama kedas ba sesaun lejizlativa foun. Sesaun ne’e sei dirije hosi Vise-Prezidente Parlamentu Nasionál, Deputada Maria Angelina Lopes Sarmento,” Sekretária Meza Parlamentu Nasionál, Deputada Lídia Norberta dos Santos Martins, ko’alia iha uma fukun, segunda ne’e.
Agora daudaun, nia dehan, se Prezidente Parlamentu Nasionál laiha fatin (ba rai-li’ur) entaun substitui hosi Vise-Prezidente Parlametu Nasionál hala’o hela Serbisu, tanba rejimentu dehan prezidente parlamentu iha impedimentu, bele fó delegasaun ba deputadu ida bele hala’o serbisu kna’ar ida-ne’e,” nia dehan.
Deputada Lídia espika, iha Rejimentu Parlamentu Nasionál artigu 45 (Sesaun lejizlativa) ne’e ko’alia de’it loron inísiu sesaun lejizlativa no data termina.
Nia dehan, iha abertura ba sesaun lejizlativa dahaat ne’e Prezidente Repúblika, Francisco Guterres ‘Lú Olo’ la partisipa, maske iha tinan kotuk partisipa.
“Iha rejimentu ne’e rasik la estabelese obrigatoriudade atu Prezidente Repúblika marka prezensa iha inísiu sesaun lejizlativa. Ne’ebé Prezidente Repúblika la partisipa,” nia hateten.
Jornalista : Evaristo Soares Martins
Editór : Cancio Ximenes
