iklan

NASIONÁL, INTERNASIONÁL, HEADLINE, POLÍTIKA

Governu Timor-Leste dekreta lutu nasionál loron-tolu ba falesimentu Jorge Sampaio

Governu Timor-Leste dekreta lutu nasionál loron-tolu ba falesimentu Jorge Sampaio

Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (18/08). Imajen TATOLI/Egas Cristóvão

DILI, 13 setembru 2021 (TATOLI)—Governu liuhosi reuniaun Konsellu Ministru (KM) extraordinária, delibera atu dekreta Lutu Nasionál ba falesimentu Antigu Prezidente Repúblika Portugeza, Jorge Fernando Branco de Sampaio, iha teritóriu nasionál laran tomak, ba períodu loron tolu, hahú ohin to’o tuku 07:59 loron 16 setembru.

“Durante períodu lutu nasionál, bandeira nasionál sei hasa’e to’o klaran de’it ka meia haste iha país laran tomak, iha fatin uzu obrigatória sira,” refere nota ne’ebé Agência TATOLI, hafoin reuniaun ezekutivu, iha Palásiu Governu, segunda ne’e.

Jorge Sampaio hakotu iis ho idade 81, iha kuidadu intensivu Hospital de Santa Cruz, Portugal, tanba sofre insufisiénsia respiratória.

Governu konsidera Antigu Xefe Estadu ne’e hanesan ema ne’ebé maka relevante tebes hodi defende povu timor-oan desde luta libertasaun no independénsia.

Primeiru-Ministru, Taur Matan Ruak, iha loron sesta, afirma katak Jorge Sampaio hanesan Prezidente ida ne’ebé kontribui maka’as ba Restaurasaun Independénsia Nasionál, ne’ebé nia mai nu’udar konvidadu da onra iha serimónia ne’ebé hala’o iha loron 20 maiu 2002.

Notísia relevante: PM Taur espresa profundu pezar ba Jorge Sampaio nia mate

Xefe Governu mós hateten tan katak, Antigu Prezidente Jorge Sampaio sei lembra iha mundu nu’udar figura boot iha kauza no liberdade no rekoñese nu’udar Belun Boot Timor-Leste no timor-oan.

Nune’e mós, Portavóz Governu no Ministru Prezidénsia Ministru, Fidelis Manuel Leite Magalhães, iha loron sesta ne’e, aprezenta kondolénsia ba família no belun Antigu Xefe Estadu no afirma katak Jorge Sampaio sempre rekordadu hosi povu Timór ba ninia kompromisu ne’ebé kle’an ba direitu umanu, justisa no solidariedade.

Notísia relevante: PR Lú Olo hato’o gratidaun ba kontribuisaun Jorge Sampaio

Antes ne’e, iha loron 28 outubru 2016, Taur Matan Ruak, ne’ebé hanesan Prezidente Repúblika momentu ne’ebá, kondekora ‘Grande Colar da Ordem Timor-Leste’ ba Antigu Prezidente Portugeza na’in-rua, Mário Soares no Jorge Sampaio, iha Lisboa, nu’udár sinál rekoñesimentu ne’ebé sinseru ba solidariedade no apoiu ativu ba luta independésia no konsidera figura rua ne’e halo esforsu determinadu hodi lori prosesu luta independénsia timor-oan ba oin.

Iha vizita ikus mai Timor-Leste iha tinan 2006, Parlamentu Nasionál atribui títulu Cidadão Honorário da República Democrática de Timor-Leste ba Jorge Sampaio.

Antigu Prezidente Portugeza ne’e moris iha Lisboa, Portugal, iha loron 18 setembru 1939.

Jornalista : Antónia Gusmão

Editora     : Julia Chatarina

iklan
iklan

Leave a Reply

iklan
error: Content is protected !!