Antigu Prezidente Repúblika Demokrátika Timor-Leste, Taur Matan Ruak (atuál Primeiru-Ministru), kondekora ‘Grande Colar da Ordem Timor-Leste’ ba Antigu Prezidente Portugés, Jorge Sampaio, iha Lisboa, loron 28 outubru 2016. Imajen/dok GPM

DILI, 10 setembru 2021 (TATOLI)—Primeiru-Ministru (PM), Taur Matan Ruak, espresa profundu pezar ba Antigu Prezidente Repúblika Portugeza, Jorge Fernando Branco de Sampaio, ne’ebé mate iha iha sesta ne’e, ho idade 81.

“Lori VIII Governu Konstitusionál, ha’u-nia naran no espoza, espresa profunda kondolénsia ba família, kolega no amigu Saudozu Antigu Prezidente Repúblika Portugeza, ne’ebé fila hikas ba kadunan Santu,” Xefe Governu hato’o mensajen liuhosi nota ne’ebé Agência TATOLI asesu, sesta ne’e.

Durante mandatu períudu rua nu’udar Prezidente Repúblika (1996-2006), mundu hatene represaun Indonézia, tanba Jorge Sampaio sempre aproveita palku internasionál sira hodi espresa nia apoiu ba kauza timor-oan ne’ebé luta ba direitu auto-determinasaun no ikus mai hetan independénsia.

Nune’e, Jorge Sampaio iha ona Timor-Leste nia istória, hanesan Prezidente ne’ebé kontribui ba Restaurasaun Independénsia nasionál, ne’ebé hanesan mós konvidadu espesiál no sai testamuña iha seremónia loron 20 maiu 2002 iha Dili.

“Antigu Prezidente Jorge Sampaio iha mundu nia matan hanesan figura ho kontribuisaun boot ba kauza no liberdade, ne’ebé konsidera hanesan Timor-Leste no povu timor-oan nia Amigu boot,” PM subliña.

Biban ne’e, Xefe Governu hato’o mós sentidu tristeza ba matebian nia espoza, Maria José Rodrigues Ritta no espera bele hetan forsa hodi bele liu tempu susar ne’e.

Jorge Sampaio desde loron 27 agostu tama iha kuidadu intensivu Hospital de Santa Cruz, Portugal, maibé ikus mai ohin loron hakotu iis tanba sofre insufisiénsia respiratória.

Antigu Prezidente Portugeza ne’e moris iha Lisboa, Portugal, iha loron 18 setembru 1939.

Ho falesimentu Antigu Xefe Estadu ne’e, Governu Portugal dekreta ona lutu nasionál ba loron-tolu, iha sábadu, domingu no segunda iha Portugal.

Antes ne’e, iha loron 28 outubru 2016, Taur Matan Ruak, ne’ebé hanesan Prezidente Repúblika momentu ne’ebá, kondekora ‘Grande Colar da Ordem Timor-Leste’ ba Antigu Prezidente Portugeza na’in-rua, Mário Soares no Jorge Sampaio, iha Lisboa, nu’udár sinál rekoñesimentu ne’ebé sinseru ba solidariedade no apoiu ativu ba luta independésia no konsidera figura rua ne’e halo esforsu determinadu hodi lori prosesu luta independénsia timor-oan ba oin.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here