Antigu Prezidente Repúblika Portugal, Jorge Sampaio. Imajen/Epesiál

DILI, 11 setembru 2021 (TATOLI)–Prezidente Repúblika, Francisco Guterres ‘Lú Olo’, hato’o profundu pezar ba Antigu Prezidente Portugal, Jorge Sampaio, nia mate no hato’o mós gratidaun ba konstribuisaun tomak ne’ebé halo ona ba Timor-Leste.

“Iha momentu tristeza ne’e, ha’u hato’o gratidaun no rekoñesimentu ba buat hotu ne’ebé Jorge Sampaio halo ba Timor-Leste bainhira sai Sekretáriu Internasionál ba Partidu Sosialista, nu’udar Prezidente Kámara Munisipál Lisboa no nu’udar Prezidente Repúblika, sempre hamutuk ho Timor-Leste iha momentu ne’ebé difisil liu,” Xefe Estadu hato’o mensajen, liuhosi nota ne’ebé Agência TATOLI asesu, sábadu ne’e.

Lori naran povu Timor-Leste no ninia-an rasik, Prezidente Repúblika hakerek karta ba ninia omologu Prezidente Repúblika Portugéza, Marcelo Rebelo de Sousa, hodi hato’o sentidu kondolénsia ba família enlutada no portugeza ne’ebé lakon Jorge Sampaio.

PR konsidera , Jorge Sampaio nu’udar ezemplu polítiku ne’ebé hala’o knaar ho seriedade no koerénsia.

“Timor-Leste lakon nia amigu ida no kompañeru luta ida iha momentu desizivu ba vida ami-nia país. Ema ida estraordináriu ne’ebé kombina matenek ho fuan, nakonu ho asauns. Jorge Sampaio nu’udar ezemplu Polítiku ne’ebé hala’o nia knaar ho seriedade no koerénsia. Nia sempre sai hun ida ba inspirasaun ba ema hotu ne’ebé hakarak serve tan kauza públika ida,” PR Lú Olo hateten.

Notísia relevante: PM Taur espresa profundu pezar ba Jorge Sampaio nia mate

Nia deskreve, Jorge Sampaio nu’udar figura markante iha istória Portugál, lutadór kolen-laek ba liberdade no demokrásia. Estadista ida integru no umanu iha kauza hotu ne’ebé nia hola parte, hatudu nia neon boot luta ba justisa, dame, liberdade no ba diálogu entre sivilizasaun.

Bainhira timor-oan na’in-rua simu Prémiu Nobel da Paz, iha Dezembru 1996, Jorge Sampaio asiste serimónia atribuisaun prémiu ne’e iha Oslo, Noruega.

“Iha tempu ne’ebé nia hatene katak Indonézia fó sinál sei muda nia pozisaun iha relasaun ho Timor-Leste, Jorge Sampaio, nu’udar Xefe Estadu, hametin kedas nia atividade ba kauza Timor-Leste, hatudu dala-ida tan nia koñesimentu kle’an kontestu internasionál no nia vizaun estratéjika,” Xefe Estadu haktuir.

Iha tinan 1999 hafoin referendu ne’ebé nakonu ho violénsia, Jorge Sampaio sai fulan insónia no serbisu maka’as liután, iha kalan no loron atu hasees trajédia ba timor-oan sira.

“Kauza Timór nian halo Sampaio tanis. Timor-Leste haksolok tebes no orgullu ho prezensa Jorge Sampaio nian iha Díli, asiste isar bandeira no rekoñesimentu internasionál ba Estadu Timor-Leste, iha 20 maiu 2002,” PR Lú Olo konta tuir.

Nune’e, iha vizita ikus mai Timor-Leste iha tinan 2006, Parlamentu Nasionál atribui títulu Cidadão Honorário da República Democrática de Timor-Leste ba Jorge Sampaio.

Iha tinan 2016, Estadu Timor-Leste rekoñese Jorge Sampaio nia solidariedade no apoiu ativu iha luta ba independénsia país, ho Grande Colar de Ordem de Timor-Leste, ne’ebé hanesan rekoñesimentu ida a’as liu iha Timor-Leste.

“Ema boot sira hanesan nia nunka mate tanba nia legadu sira sei hela metin hosi jerasaun ba jerasaun,” Prezidente Repúblika dehan.

Jorge Fernando Branco de Sampaio, hakotu iis iha sesta (10/09) iha ospitál Lisboa, ho idade 81, tanba sofre insufisiénsia respiratória.

Antigu Prezidente Portugeza ne’e moris iha Lisboa, Portugal, iha loron 18 setembru 1939.

Jornalista : Osória Marques

Editora      : Julia Chatarina

HAKEREK NO HATÁN

Please enter your comment!
Please enter your name here