Vise Primeiru-Ministru no Ministra Solidariedade Sosiál no Inkluzaun, Armanda Berta dos Santos, prezide reuniaun Konsellu Ministru, iha auditorium Ministériu Finansa, Aitarak-laran, kuarta (08/09). Imajen TATOLI/Egas Cristóvão

DILI, 08 setembru 2021 (TATOLI)—Governu liuhosi reuniaun Konsellu Ministru (KM) iha kuarta ne’e, deside hakotu konfinamentu domisiliáriu jerál iha Dili, hahú tuku 23:59, loron 09 setembru 2021.

Desizaun ne’e, hafoin halo analiza ba aprezentasaun hosi koordenadór Sala Situasaun Sentru Integradu Jestaun Krize (CIGC, sigla portugés) kona-ba situasaun epidemiolójika país.

“Konsellu Ministru deside levanta impozisaun konfinamentu domisiliáriu jerál iha Dili, hahú aban kalan (meia noite), bainhira rezolusaun ba konfinamentu vijente kaduka mak sei la extende tan,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu iha auditorium Ministériu Finansa, Aitarak-laran.

Nune’e, Portavóz Governu husu komunidade sira, atu mantein regra sanitária ne’ebé fó sai hosi Ministériu Saúde no Organizasaun Mundiál Saúde.

“Konsellu Ministru husu atu sidadaun hotu, ida-idak asume responsabilidade ba sira-nia saúde, família família nia saúde no komunidade nia saúde, atu kontinua tau ein prátika ho rigór máskara, fase liman, halo distánsiamentu, hanesan regra sira ne’ebé iha ona,” nia apela.

Notísia relevante: Igreja Katólika husu Governu implementa regra nesesáriu durante konfinamentu domisiliáriu

Tuir Ministru, Governu sei servisu hamutuk ho sosiedade no instituisaun sosiál hanesan konfisaun relijioza no organizasaun marsa sira atu iha kompromisu forte hodi bele implementa protokolu saúde.

“Hosi parte entidade Estadu, liuliu autoridade seguransa sei kontinua ho sira ninia servisu atu nune’e bele apela n fó hanoin ba komunidade atu impoin nafatin regra, nune’e sidadaun sira kumpre protokolu saúde. Governu mós husu ba loja, motorista, restaurante, eventu sosiál, atu hotu-hotu kumpre hafatin regra sanitária no evita labele iha aglomerasaun boot, tanba bainhira akontese, autoridade seguransa sei fó hanoin ba entidade sira atu kumpre protokolu saúde,” Portavóz Governu fó hanoin.

Antes ne’e, haree ba evoluasaun COVID-19 iha Dili, Governu impoin konfinamentu domisiliáriu jerál ba populasaun iha Dili entre tuku 00:00 loron 27 agostu to’o tuku 23:59 loron 02 setembru 2021.

Notísia relevante: Konfinamentu domisiliáriu Dili mantein to’o 09 setembru, hakotu iha Ermera

Hafoin iha loron 01 setembru, Governu deside extende konfinamentu ba loron hitu tan, hahú loron 03 to’o 09 setembru.

Ezekutivu deside konfinamentu domisiliáriu hodi fó biban Governu halo estratejia foun proteje ninia sidadaun hosi vírus variante Delta COVID-19, tanba iha fulan-agostu nia laran, rejista kazu pozitivu 6.000 no númeru óbitu sa’e maka’as.

Jornalista : Antónia Gusmão

Editora : Julia Chatarina

HAKEREK NO HATÁN

Please enter your comment!
Please enter your name here