Igreja Katedral Dili. Imajen TATOLI/Egas Cristóvão

DILI, 06 setembru 2021 (TATOLI)—Igreja Katólika husu Governu implementa regra konfimanentu domisiliáriu jerál ne’ebé nesesáriu, nune’e baihira halo tan extensaun períodu ne’e iha Dili, komunidade bele iha fiar no la’o tuir hodi prevene propagasaun COVID-19 sai maka’as liután.

Lia hirak ne’e hato’o hosi Padre Pároku Balide, Graciano dos Santos Barros, ne’ebé reprezenta Arsebispu Arkidioseze Metropolitana Dili, Don Virgílio do Carmo da Silva, bainhira hasoru malu ho Portavós Governu no Ministru Prezidénsia Konsellu Ministru, Fidelis Manuel Leite Magalhães, hodi ko’alia kona-ba implementasaun regra konfinamentu domisiliáriu.

“Ko’alia oituan kona-ba situasaun konfinamentu ne’ebé parte Uma-kreda iha Dili hapara ona atividade relijioza, entaun bainhira atu hapara ita tenke haree filafali, nune’e bainhira iha extensaun ita bele haree buat balun hodi mellora di’ak liután,” Padre Graciano, hateten hafoin enkontru iha edifísiu Ministériu Finansa, Aitarak-laran, segunda ne’e.

Notísia relevante: Konfinamentu domisiliáriu Dili mantein to’o 09 setembru, hakotu iha Ermera

Nia fó ezemplu hanesan regra konfinamentu ne’ebé bainhira halibur ema labele liu sanulu atu haloot ema mate.

“Nesesáriu ka lae tanba ema timor barak tebes, ita bele hirus malu hosi parte Uma-kreda seguransa no autoridade Governu ninian, dehan katak ida-ne’e oinsá la halo tuir regra tanba labele duni, tanba ne’e presiza buka dalan hodi hadi’a,” Padre Pároku Balide dehan.

Tuir Padre, Uma-kreda prontu atu kolabora ho parte kompetente iha implementasaun no hadi’a regra.

Iha fatin hanesan, Ministru Fidelis, haktuir, durante enkontru, parte Governu no igreja diskute hodi halo esforsu posível atu konsensializa regra ba populasaun.

“Igreja hanesan Governu nia parseiru di’ak tebes, ne’ebé papél igreja ita labele tau ses hosi kontestu sosiál no kulturál, tanba ne’e maka Governu komprometidu atu hadi’a,” nia hatutan.

Nune’e, governante ne’e kongratula kontribuisaun igreja ne’ebé di’ak tebes ba serbisu prevensaun propagasaun COVID-19.

Antes ne’e, Governu impoin konfinamentu domisiliáriu iha Dili hahú 27 agostu to’o 02 setembru, hafoin halo extensaun ba loron hitu tan, to’o loron 09 setembru.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here