Reuniaun Konsellu Ministru iha auditorium Ministériu Finansa, Aitarak-laran, kuarta (01/09). Imajen TATOLI/Francisco Sony

DILI, 01 setembru 2021 (TATOLI)Governu liuhosi reuniaun Konsellu Ministru (KM) ne’ebé prezide hosi Vise Primeiru-Ministru no Ministru Planu no Ordenamentu, José Maria dos Reis, deside hodi mantein konfinamentu domisiliáriu jerál iha munisípiu Dili ba loron-hitu tan.

Desizaun ne’e ezekutivu sira foti hafoin halo analiza aprezentasaun hosi Sala Situasaun, Sentru Integradu Jestaun Krize (CIGC, sigla portugés), kona-ba pontu situasaun epidemiolójika nasionál.

“Governu deside mantein konfinamentu obrigatóriu jerál ka lockdown ba populasaun iha munisípiu Dili to’o loron 09 setembru 2021,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha salaun auditóriu Ministériu Finansa, Aitarak-laran, kuarta ne’e.

Notísia relevante: Governu aplika hikas konfinamentu domisilariu iha Dili hahú 27 agostu

Konfinamentu iha Dili ne’ebé vijente hela, hahú loron 27 agostu to’o 02 setembru.

Portavóz Governu klarifika, durante konfinamentu, ema hotu iha munisípiu Dili inklui sira ne’ebé simu vasina kompleta kontra COVID-19 kontinua hela iha uma, bele sai de’it tanba razaun saúde, serbisu iha kazu administrasaun públika, superiór define funsionáriu ne’ebé maka dispensadu hosi dever komparénsia, atu asesu ba sasán no serbisu ba nesesidade bázika no atu simu vasina.

Nune’e, fatin hirak hanesan estabelesimentu komersiál, industriál, artezanál ka prestasaun servisu iha setór privadu área ekonomia iha munisípiu Dili taka ba públiku, ho esesaun sira ne’ebé prevee antes.

“Kompara ho rezolusaun anteriór, rejista de’it alterasaun rua, ne’ebé permite atu sai hosi uma ba fatin seluk hodi realiza resenseamentu eleitorál no ba parte seluk atu asegura funsionamentu empreza prestasaun servisu sira ba kontrolu peste,” governante esplika.

Biban ne’e, ezekutivu sira deside la renova ka hakotu ona impozisaun konfinamentu obrigatóriu jerál ba populasaun iha postu administrativu Ermera no Railaco, munisípiu Ermera.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here