Ró Sea Bound hosi Austrália tula pasajeiru 500 resin, ohin to’o iha Portu Dili. Imajen TATOLI/António Gonçalves

DILI, 08 setembru 2021 (TATOLI)–Governu liuhosi reuniaun Konsellu Ministru (KM) iha kuarta ne’e halo analiza filafali planu dezenvolvimentu ba reestruturasaun no modernizasaun Portu Dili.

“Konsellu Ministru manifesta ona ninia preferénsia hodi adota modalidade finansiamentu Parseria Públiku-Privada (PPP) atu dezenvolve tuir kuadru legál no regulamentu ein vigór,” Ministru Prezidénsia Konsellu Ministru, Fidelis Manuel Leite Magalhães, hateten, hafoin ramata reuniaun ezekutivu iha auditorium Ministériu Finansa, Aitarak-laran.

Notísia relevante: Governu planeia transforma Portu Dili sai zona turístika

Planu ne’e hetan ona deliberasaun iha sorumutuk KM iha loron 28 jullu 2021, maibé, tanba iha alterasaun balun iha faze redasaun finál, mak presiza submete fali ba deliberasaun foun.

Planu ne’e prevee katak hafoin transferénsia funsaun hosi portu karga bá portu foun Tibar, sei halo ninia konversaun ba mariña no portu kruzeiru sira.

“Ida-ne’e projetu importánsia nasionál, haree ba ninia lokalizasaun iha área estratéjika sentrál ida no importante iha sidade Dili, ninia funsaun iha ligasaun marítima ba populasaun sira hosi Oé-cusse Ambeno no Ataúru, inklui ninia potensiál atu sai polu dinamizadór turizmu marítimu iha Timor-Leste,” Ministru subliña.

Notísia relevante: Konstrusaun Portu Tibar Atinje Ona Porsentu 30

Enkuantu, daudaun ne’e konstrusaun Portu Tibar to’o fulan-maiu progresu fíziku atinje ona 30%, ne’ebé kompleta ona reklamasaun no kee ba Portu Tibar, harii pedreira, batching plant, precast yard, Jetty temporáriu, steel piling, no produsaun estrutura fatuk la’o daudaun, maibé kona-ba taxa sei konsolida ho rai ne’ebé mak reklama.

Portu Tibar harii iha rai ektare 27 no sei iha doka ho metru 630 no konstrusaun ne’e sei hala’o durante tinan tolu, hahú loron 30 agostu 2018 no tuir planu sei ramata iha 30 agostu 2021, maibé tanba kondisaun COVID-19 difikulta mvimentu sasán no ema, tanba ne’e sei extende durasaun serbisu.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here