Atividade iha Portu Tibar. Imajen Tatoli/António Gonçalves

DILI, 10 juñu 2020 (TATOLI) – Diretór Kompañia China Harbour Timor, Lda, Wang Wei, informa atividade konstrusaun Portu Tibar ne’ebé antes ne’e konsege suspende maibé daudaun ne’e la’o filafali no to’o fulan-maiu progresu fíziku konstrusaun atinje ona porsentu 30.

“Konstrusaun to’o ona porsentu 30, hanesan progresu fíziku inklui kompleta reklamasaun no kee ba Portu Tibar, harii pedreira, batching plant, precast yard, Jetty temporáriu, steel piling, no produsaun estrutura fatuk la’o daudaun, maibé kona-ba taxa sei konsolida ho rai ne’ebé mak reklama,” tenik Diretór kompañia xineza ne’e hodi responde pergunta Agência Tatoli via email, kuarta ne’e.

Nia rekoñese, pandemia globál COVID-19 fó impaktu grave tebes ba projetu Portu Tibar husi aspetu ema sira ne’ebé mak servisu iha terrenu, importasaun ba materiál konstrusaun, ekipamentu no redusaun iha grau produsaun.

Notísia Relevante: Atividade Iha Portu Tibar Sei La’o Nafatin Durante Estadu Emerjénsia

“Estadu Emerjénsia ba prevensaun no kombate pandemia globál fó  impaktu mós ba restrisaun viajen no sirkulasaun internasionál ne’ebé komesa husi fevereiru 2020. Tanba ne’e ami labele mobiliza funsionáriu estranjeiru husi xina no husi nasaun seluk mai Timor-Leste no ami iha problema báziku kona-ba menus ekipamentu médiku iha fulan hirak nia laran, espesialmente maskára, luvas, PPEs, teste temperature no seluk tan,” nia subliña.

Tuir nia, menus ekipamentu médiku maka halo traballadór lokál sira labele mantein servisu iha fatin projetu tanba importasaun materiál konstrusaun no ekipamentu seluk mós tarde kompara ho situasaun normál.

Kompañia Hakarak Husu Autorizasaun Governu Timor-Leste Hodi Haruka Mai Traballadór

Kompañia Xina Harbour iha ona planu atu haruka pedidu ba Governu Timor-Leste atubele hodi traballadór sira mai iha Timor-Leste.

“Ami sei hato’o pedidu ba aprovasaun esepsionál gradualmente ba Governu hodi traballadór sira bele filafali ba sira-nia pozisaun husi tempu ida ba tempu seluk. Iha tempu besik oin mai atu haruka filafali traballadór lokál hamutuk 280 tama. Ami mós prepara hela nesesidade médiku ne’ebé mak presiza, atu nune’e porsentu 100 bele loke konstrusaun projetu Portu Tibar ho konformidade Dekretu Governu ne’ebé mensiona kona-ba kontrola internál no medida prevensaun COVID-19,” Wang Wei subliña.

Nia dehan, situasaun ne’e halo efisiésia servisu tun no traballadór barak mak fila ba sira-nia rai.

“Iha momentu ne’e ita espera bele fila ba situasaun normál, tanba ita-nia ezijénsia urjente mak oinsá bele lori filafali funsionáriu tékniku sira husi Xina mai Timor-Leste no lori traballadór lokál sira ba fali sira nia pozisaun. Iha ne’ebá kuaze ema na’in-160 mak sei iha Xina desde tinan foun Xina nia iha fulan-janeir 2020,” nia akresenta.

Antes ne’e, Jerente Unidade Jestaun Projetu Portu Tibar, Rui Soares, halo aprezentasaun ba Komisaun Interministeriál ba Projetu Portu Tibar ka Project Steering Committee (PSC) relasiona ho progresu konstrusaun ne’ebé to’o finál dezembru 2019 atinje ona porsentu 20,69 ho nia dezeñu ne’ebé maka atinje mós progresu porsentu 87,57.

Atividade ne’ebé la’o iha terrenu ba dragajen ka eskavasaun rai iha tasi okos no ateru kompletu ona. To’o iha inísiu dezembru 2019 ne’e área ektare 27 maka atu utiliza ba terminál kontentór sira, ateru kompletu hotu ona no hein de’it konstrusaun kais no konstrusaun edífísiu sira.

Kona-ba melloramentu rai aterru sei kontinua no presiza halo 52.000 perfurasaun atu lori konolida rai ne’ebé ateru atubele prevene rai nakfera kuandu iha eventu rai nakdoko ruma.

Envolve Kompañia Lokál 53

Dezenvolvimentu kontiúdu lokál to’o outobru 2019 iha kontratu ho kompaña lokál kuaze 53 ho valór totál liu miliaun $19.

Ema sira ne’ebé servisu indireta husi kompaña sira ne’e hamutuk 375, ho totál traballadór lokál no estranjeiru ba konstrusaun Portu Tibar hamutuk 446, ne’ebé korresoinde ho partisipasaun traballadór lokál hamutuk porsentu 62,68 no estranjeiru porsentu 37,32.

Konstrusaun Portu Baía Tibar ho modalidade Parseria públika Privada (PPP) husi konsórsiu Governu Timor-Leste ne’ebé aloka hamutuk millaun $130 no Timor Port inklui Bolloré hamutuk millaun $140, ho totál millaun $270 ba faze inísiu.

Totál investimentu orsamentu ba Portu Tibar to’o tinan 30 ho valór millaun $500.

Projetu ne’e hanesan parseria dahuluk ba infraestrutura públika privada iha Timor-Leste no hanesan investimentu boot ne’ebé realiza husi kompañia estranjeira iha Timor-Leste to’o ohin loron.

Timor-Leste sei iha Portu ho performa ne’ebé a’as ho nia distánsia kilómetru 12 husi kapitál Dili.

Iha 2020, Portu Tibar sei sai hanesan portu ida ne’ebé boot liu iha Timor-Leste no infraestrutura sei aumenta kapasidade ba volume importasaun no esportasaun.

Portu Baía Tibar sei sai sentru transborda rejionál ida, ne’ebé lokaliza iha área dinámika ida iha mundu no serve movimentu entre Xina, Hong Kong no Singapura ba diresaun Papua, Indonézia no Norte Austrália hanesan Portu Deepwater dahuluk iha rejiaun ne’e.

Portu ne’e harii iha rai ektare 27 no sei iha doka ho métru 630 no konstrusaun ne’e sei hala’o durante tinan tolu, hahú loron 30 agostu 2018 no tuir planu sei ramata iha 30 agostu 2021.

Jornalista: Florêncio Miranda Ximenes

Editora: Julia Chatarina

 

 

HAKEREK NO HATÁN

Please enter your comment!
Please enter your name here