DILI, 28 jullu 2021 (TATOLI)--Governu liuhosi reuniaun Konsellu Ministru (KM) aprova ho alterasaun, projetu deliberasaun ne’ebé aprezenta hosi Ministru Transporte no Komunikasaun (MTK), José Agustinho da Silva, kona-ba planu dezenvolvimentu Portu Dili atu re-konstrui no moderniza sai zona turístika.
“Konsellu Ministru aprova projetu deliberasaun planu dezenvolvimentu Portu Dili, ne’ebé prevee re-estruturasaun no moderniza Portu Dili hafoin transferénsia funsaun hosi portu karga ba portu foun Tibar, no nia konversaun iha mariña ida no portu kruzeiru,” Ministru Prezidénsia Konsellu Ministru , Fidelis Manuel Leite Magalhães, hateten iha Palásiu Governu, kuarta ne’e.
Tuir Portavóz Governu, bainhira konstrusaun portu Tibar ramata, Governu hakarak transforma Portu Dili sai zona turístika ida atubele sai portu ida ne’ebé ró turístiku bele atrraka, la’ós ba ró komérsiál.
Planu dezenvolvimentu ne’e sei elabora hosi MTK hamutuk ho komponente ida, kona-ba opsaun dezenvolvimentu no moderniza área ne’e.
Ministru konsidera, planu ne’e hanesan prioridade ba Governu, liuliu ba Primeiru-Ministru, Taur Matan Ruak, atu investe hodi diversifika ekonomia liuhosi setór turizmu
“Ita hakarak foti pasu ida prevee investimentu iha projetu, atu garante retornu boot no iha aumentu turizmu no investimentu privadu, inklui dezenvolve negósiu no kria empregu,” nia akresenta.
Nune’e, Governu iha kompromisu atu aselera planu dezenvolvimentu ne’e atu sai kapitalizadór ba dezenvolvimentu ekonómiku iha Timor-Leste.
Jornalista : Florêncio Miranda Ximenes
Editora : Julia Chatarina
