Ró –ahi Berlin Nakroma atu atraka iha Portu Dili. Imajen TATOLI/Egas Cristóvão

DILI, 07 setembru 2021 (TATOLI)—Ministru Transporte no Komunikasaun, José Agostinho da Silva, hateten, ligasaun via marítima daudaun ne’e sai problema tanba ro-ahi Berlin Nakroma no Success ne’ebé durante ne’e asegura ligasaun Dili bá Oé-cusse no Ataúro, seidauk halo manutensaun.

“Ha’u orienta hela de’it katak tenke lori ona ró ba halo manutensaun, maibé to’o agora seidauk bá ho razaun tanba COVID-19, maibé durante ne’e Governu kontinua selu tripulante sidadaun Indonézia tanba ita tenke asegura ema-nia direitu. Durante ne’e Autoridade Portuária Timor-Leste (APORTIL) mak kontratu hodi jere ita-nia ró-ahi,” Ministru José Agostinho hateten ba Agência TATOLI, iha resintu Ministériu Finansa (MF), tersa ne’e.

Notísia relevante: Konklui verifikasaun faktu ró Tranship, CAC sei submete krime ba MP

Enkuantu, ró subtitutu hanesan Tranship II ne’ebé antes ne’e Governu aluga atu asegura ligasaun marítima, sai polémika no autoridade kompetente suspende operasaun, ikus mai ró ne’e fila ona ba Indonézia.

“Ho esperiénsia foin lalais akontese no sai polémika kona-ba ró subtitutu, ita-nia situasaun reál tempu ne’ebá, ha’u konsidera Governu iha nesesidade aluga ró atu responde ba situasaun ne’e, tanba ró-ahi Berlin Nakroma avaria to’o agora seidauk halo manutensaun no ró-ahi Success ne’ebé durante ne’e la’o hodi asegura konetividade marítima rasik, ho kondisaun la permite ona tanba tenke halo manutensaun no renova dokumentu,” nia konta tuir.

Nune’e, Governu aluga Tranship II ba fulan-rua de’it, molok sai polémika no autoridade kompetente halo inspesaun.

Nune’e, tuir Ministru, Governu laiha ona orsamentu hodi kontrata ró hosi nasaun seluk.

“Daudaun ne’e konetividade marítima sai problema tanba seidauk iha ró no orsamentu laiha ona atu aluga ró tanba orsamentu ne’ebé antes ne’e aprova ezekuta hotu ona hodi aluga ró ne’ebé sai polémika,” nia akresenta.

Notísia relevante: APORTIL aprosima dirijente ró halo operasaun Dili bá Oé-cusse no Ataúro

Maski nune’e, daudaun APORTIL aprosima hela dirijente kompañia Ataúro Express ne’ebé iha ró feri rua inklui ró ELCT Samudra Bintang Delapan atu fasilita transporte ba pasajeiru hosi Dili bá Oé-cusse no Ataúro.

Aprosimasaun ne’ebé sei iha faze diskusaun, katak Governu sei fó subsídiu ba kompañia lokál rua hodi ajuda transporta pasajeiru via marítima.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here