Vogal I APORTIL, José Madeira Marques. Imajen TATOLI/Egas Cristóvão

DILI, 27 agostu 2021 (TATOLI)Vogal I Autoridade Portuária de Timor-Leste (APORTIL), José Madeira Marques, hateten, daudaun ne’e parte Autoridade ko’alia ona ho dirijente ró rua atu fasilita transporte ba pasajeiru hosi Dili bá Oé-cusse no Ataúro.

“Agora ita ko’alia ona ho kompañia Ataúro Express ne’ebé iha ró feri rua, ita mós ko’alia ho ró ELCT Samudra Bintang Delapan, atu sira mós prepara kada domingu ida ka rua tula de’it kargu, sira la tula pasajeiru, maibé iha toleránsia dispensa hosi parte Harbour Master nu’udar reguladór ba ró, katak iha APORTIL, ofisiál sira  ne’ebé atu halo serbisu ruma iha Oé-cusse ka Ataúro, ita tenke fó fatin atu sira bele tuir,” Vogal I APORTIL informa iha ninia knaar fatin, Portu Dili, Colmera, sesta ne’e.

Ro-ahi Berlin Nakroma daudaun seidauk ba dokin tanba situasaun pandemia.

Kona-ba kuantidade tula pasajeiru, parte APORTIL sei koordena fali ho parte Harbour Master hodi halo inspesaun ba kondisaun ró no sei koordena ho Sentru Integradu Jestaun Krize (CIGC, sigla portugés).

“Atu tula ema, ita tenke haree situasaun ida agora hanesan pandemia, Estadu Emerjénsia, Serka Sanitária no Konfimantu Obrigatóriu, entaun tenke iha koordenasaun entre entidade tomak,” nia akresenta.

CIGC mak sei deside bele tula ema hira, enkuantu APORTIL fasilita de’it.

Governu fó oportunidade ba empreza lokál hodi ajuda halo transportasaun pasajeiru via marítima.

“Ita fó oportunidade ba sira atu operasionaliza transporte no fasilita tula ema sira ne’e tuir idaidak ninia destinasaun,” nia hatutan.

Governu sei fó subsidiu ba ró rua ne’e bainhira atu halo operasaun tula pasajeiru, maibé subsídiu ne’ebé maka atu fó ró rua ne’e iha hela prosesu diskusaun hela.

“Normamente ita fó subsídiu ba ró rua ne’e tanba kompañia privadu no ita laiha kontratu, enkuantu subsídiu atu fasilita serbisu tula pasajeiru, horiseik ami ko’alia hamutuk Diresaun Nasionál Transporte Marimítima (DNTM) no Konsellu Administrasaun APORTIL sei diskute kestaun ne’e,” nia hatutan.

Daudaun ne’e, APORTIL iha planu koordenasaun ho ró rua ne’e no sei fó sai oráriu operasaun fixu ba públiku.

Jornalista : Natalino Costa

Editora      : Julia Chatarina

HAKEREK NO HATÁN

Please enter your comment!
Please enter your name here