Vise-Prezidente Parlamentu Nasionál, Maria Angelina Lopes Sarmento. Imajen Tatoli/Egas Cristóvão

DILI, 07 setembru 2021 (TATOLI)–Parlamentu Nasionál hahú diskute projetu-lei protesaun labarik no foinsa’e iha perigu iha faze espesialidade.

Notísia Relevante: Komisaun F konklui relatóriu pareser projetu-lei protesaun labarik

“Tanba ita laiha korum deliberativu entaun ita labele halo votasaun ba projetu-lei ida-ne’e. Nune’e mós tanba ita la halo votasaun, di’akliu ita lalika halo diskusaun iha loron ohin no ita adia ba próxima plenária,” Prezidente Parlamentu Nasionál Ein-Ezersísiu, Deputada Maria Angelina Lopes Sarmento, anunsia liuhosi plenária, tersa ne’e.

Objetivu prinsipál hosi projetu-lei ne’e atu proteje direitu no protesaun labarik sira no joven iha perigu, ho forma bem-estar no dezenvolvimentu integrál.

Inisiativa lejizlativa ne’e bazea ba rezolusaun Parlamentu Nasionál númeru númeru 16/2003, 30 jullu, ne’ebé Timor-Leste ratifika Konvensaun kona-ba Direitu Labarik. Projetu-lei ne’e ho Kapítulu hamutuk IX no artigu hamutuk 135.

Tuir observasaun Agência TATOLI nota katak, iha ajenda debate iha epesialidade ne’e foin mak halo leitura ba relatóriu no paresér Komisaun F nian seidauk tama diskusaun kada artigu.

Entidade sira-ne’ebé submete paresér ba projetu-lei ne’e mak hanesan ALFeLa, Asosiasaun Defisiente Timor-Leste (ADTL), Child Fund, Komisaun Nasionál Direitu Labarik, FOKUPERS, FONGTIL, JSMP, Ministériu Justisa, Ministériu Saúde, Ministériu Solidariedade Sosiál no Inkluzaun, Ministériu Públiku, Organizasaun Internasionál ba Traballu (OIT), Parlamentu Foinsa’e, Plan International, PDHJ no UNICEF.

Notísia Relevante: Grupu Aliansa Labarik Feto husu PPN prioritiza projetu-lei protesaun labarik

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here