Diretora Plan International, Dillyana Ximenes. Imajen TATOLI/Evaristo Soares Martins.

DILI, 05 agostu 2021 (TATOLI) — Grupu Aliansa Labarik Feto Timor-Leste (GALFTL) husu Prezidente Parlamentu Nasionál (PPN), Deputadu Aniceto Longuinhos Guterres Lopes, prioritiza projetu-lei protesaun labarik no foin sa’e iha perigu, nune’e bele hetan aprovasaun hosi uma fukun.

Grupu Aliansa Labarik Feto Timor-Leste (GALFTL) ne’e harii hosi Plan International ho objetivu tau matan ba labarik feto no mane sira iha Timor-Leste.

Plan International hamutuk ho Aliansa Labarik Feto Timor-Leste, ohin, hasoru Prezidente PN, hodi hato’o paresér ba projetu-lei ne’e no husu xefe lejizladór fó importánsia ba projetu-lei ne’e.

“Ami mai husu Prezidente Parlamentu Nasionál fó prioridade no ami husu prezidente nia kompromisu ba projetu-lei ida-ne’e atu-bele hetan aprovasaun”, Diretora Plan International, Dillyana Ximenes, ba jornalista sira, hafoin hasoru malu ho PPN iha sala konferénsia uma fukun.

Diretora Plan International fó-sai, bainhira projetu-lei ne’e sai ba lei sei proteje labarik feto no mane sira iha tempu bainbain no iha tempu emerjénsia.

Nia apresia ho lejizladór sira-ne’ebé inísia projetu-lei ne’e, tanba iha situasaun atuál labarik barak mak abandona no balun hetan violasaun oinoin.

“Prezidente Parlamentu Nasionál iha kompromisu hodi akompaña no sei aselera projetu-lei protesaun labarik ne’e”, nia haktuir.

Grupu Aliansa Labarik Feto ne’e kompostu hosi labarik feto sira no labarik mane sira-ne’ebé mak hetan empoderamentu másimu hosi Plan International, parseiru sira seluk no entidade governu nian, nune’e sai fali kampiaun ba mudansa ba asuntu sira-ne’ebé relasiona ho labarik sira-nia direitu.

Nune’e mós direitu ba sobrevivente, direitu ba dezenvolvimentu, direitu ba edukasaun, direitu ba protesaun no direitu ba partisipasaun.

Plan International nia defininisaun balun ne’ebé bele sai referénsia

Definisaun Protesaun labarik: mak asaun sira-ne’ebé ema hotu tenke hatudu nu’udar nia responsabilidade primária hodi halo prevensaun, mitigasaun no responsivu atu hapara hahalok no aktu sira-ne’ebé halo terus labarik no foinsa’e sira iha situasaun normál no emerjénsia.

Abuzu ka perigu hasoru labarik: Mak hanesan fórma hahalok oinoin mak abuzu fíziku, abuzu psikolójiku ka emosionál, abuzu abandonadu no abuzu seksuál ne’ebé halo hasoru labarik.

Abuzu Fíziku : Hahalok eh atitude ne’ebé direitamente afeta ba labarik sira-nia isin-lolon ka fíziku, akontese halo hosi parente sira, ema-ne’ebé iha pozisaun forte liu, ema-ne’ebé iha responsabilidade no ema ne’ebé sira fiar, ida-ne’e akontese dala ida ka bele repete beibeik.

Abuzu Emosionál: Mak hahalok la apropriadu no laiha sentidu hodi bele dezenvolve labarik ho situasaun ida-ne’ebé la favorese, ida-ne’e bele fó impaktu ba labarik nia mental, espirituál, morál no dezenvolvimentu sosiál

Abuzu Abandonadu: Mak hahalok ne’ebé ladún iha tratamentu no intensaun ida-ne’ebé la adekuadu hosi ema-ne’ebé tau-matan ba labarik (inan-aman no adultu seluk).

Abuzu Seksuál: Hahalok envolve labarik iha atividade seksuál ne’ebé labarik ne’e rasik la kompriende. Abuzu seksuál bele direitamente afeta ba labarik nia isin lolon (fíziku) no mós ho maneira seluk hodi bele satisfaz adultu ka ema seluk nia hanoin ne’ebé negativu.

Ema Foin Sae ka “Joven”: Adere ba Nasaun Unida nia defenisaun sira, foinsa’e sira mak inklui individu sira – feto foin sa’e, mane fóin sa’e no ema foin sa’e sira hosi identidade sira seluk- idade tinan 15-24. Grupu ida-ne’e entre kategoria sira hosi Labarik sira, adolesente sira no adultu sira’ maibé liga ba ema foin sa’e sira-ne’ebé iha nesesidade partikulár salvaguarda ne’ebé rekere konsiderasaun ketak hosi labarik foin sa’e sira no adultu sira.

Esplorasaun labarik: Mak utiliza labarik ba objetivu lukrutivu, ekonómiku ka seksuál ema seluk ne’ebé dala barak rezulta injustisa, kruel ka sai atan no fó perigu ba labarik.

Violénsia hasoru Labarik no ema foin sa’e: Inklui forma sira husi violénsia fíziku no mentál, kanek ka abuzu, neglijénsia ka tratamentu neglijente, no komérsiu ka u esplorasaun sira seluk ba labarik ka ema fóin sa’e. Aktu hosi violénsia bele mós akontese liuhosi online ezemplu, website, mídia sosiál, telemovel. Ida-ne’ebé bele aktu Internationál ne’ebé envolve uza forsa fíziku ka poder tanba fallansu hodi atende ba prevensaun ba violénsia hasoru labarik no ema foin sa’e sira. Violénsia ne’e konsiste hosi saida de’it ne’ebé individu sira no grupu sira.

Violénsia bazea ba Jéneru: Mak estragu fíziku no emosionál inklui abuzu seksuál, ka ameasa hosi risku sira-ne’ebé hatudu ba individu ka grupu ruma bazea ba sira-nia sexu ka jéneru. Ida-ne’e abuzu podér ka uza sala podér no ida-ne’e hanesan rezultadu husi asaun ka inaktivu hosi individu, komunidade no estadu.

Bullying/Intimidasaun: Ema-ne’ebé ho karatér arrogante hodi book ema seluk ne’ebé fraku, iha kompriensaun ne’ebé sai signifikante nomoos jerál liu kona-ba forma perigu ne’ebé labarik enfrenta. Ida-ne’e dala ruma halo forma fíziku nomoos intimidasaun verbál, agresaun ka ataka, violénsia.

Komersiál/bisnis ka esplotasaun seluk ba labarik: Refere ba uza labarik iha serbisu ka atividade sira seluk ne’ebé benefísia ba ema seluk (terseira parte) maibé ida ne’e laiha limite, serbisu labarik no prostitusaun labarik. Atividade ida-ne’e mak estraga labarik nia parte fíziku ka saúde mentál, edukasaun, morál ka kresimentu emosionál no sosiál (WHO 1999).

Rede Protesaun Labarik: Mak órgaun kompetente ba protesaun labarik lidera hosi MSSI ne’ebé kompostu husi entidades oinoin husi Governu, Sosiedade Sivíl sira no ajénsia akreditadu sira atu halo kooperasaun serbisu iha asuntu sosiál, saúde, edukasaun no fó asisténsia legál sira ba asuntu labarik no foin sa’e sira-nian.

Definisaun mekanismu protesaun labarik: Mekanismu protesaun labarik mak prátika no prosesu dezeña atu asegura no garantia situasaun seguru ba labarik sira hosi abuzu seksuál, emosionál, fíziku no abandonadu hosi nível komunidade, Governu lokál to’o nível Nasionál.

Objetivu sira hosi Mekanismu Protesaun Labarik iha Komunidade : Atu hakbesik sistema protesaun labarik ba nivel komunidade, atu komunidade (inan-aman), membru konsellu suku, profesór sira no labarik estudante sira rasik envolvidu, organizadu no hatene ida-idak nia papél hodi ko’alia kona-ba asuntu direitu no protesaun labarik.

Nune’e mós atu tulun komunidade (inan-aman no labarik sira) hodi kanaliza informasaun lalais, nune’e sira bele hatene mekanismu no aprosimasaun ne’ebé di’ak atu responde aktu sira-ne’ebé kontra direitu labarik iha nível komunidade.

Notísia relevante: Plan International rekomenda espesífika kada artigu projetu-lei protesaun labarik ba PN

Jornalista  : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here