Labarik sira halimar ho ksolok, iha Caicoli. Imajen TATOLI/António Gonçalves

DILI12 agostu 2021 (TATOLI)–Komisaun F ne’ebé trata asuntu Saúde, Seguransa Sosiál no Igualdade Jéneru, konklui ona relatóriu pareser projetu-lei protesaun labarik no joven iha perigu, hafoin rona hanoin hosi entidade relevante.

“Ohin, loron ikus ami halo aprovasaun ba ami-nia relatóriu pareser, ne’ebé sei envia ba Prezidente Parlamentu Nasionál lorokraik ne’e atu hetan konsiderasaun no ajenda ba diskusaun jeneralidade,” Prezidente Komisaun F, Noé da Silva Ximenes ‘Buka-Tuir’, informa, iha Otél JL Villa, Fatuhada, kinta ne’e.

Notísia relevante: PN konkorda muda títulu projetu lei protesaun labarik

Diskusaun tuir mai iha plenária, sei akomoda inisiativa mudansa titulu ne’ebé iha alternativa tolu hanesan lei minoridade, lei protesaun ba labarik sira, no lei protesaun ba labarik no joven sira iha perigu.

Projetu-lei ne’e antes iha artigu hamutuk 103, maibé agora daudaun aumenta ona ba 135, ho nune’e presiza tempu másimu hodi halo diskusaun.

Tuir Deputadu Noé, razaun aumenta artigu tanba iha audénsia públika, iha situasaun balun ne’ebé presiza inklui iha laran.

 “Ezemplu hanesan definisaun ba labarik no joven sira, inklui definisaun ba família, ita tenke sita mós iha ne’ebá, tanba ho definisaun barak maka aumenta artigu,” nia esplika.

Intituisaun sira ne’ebé antes ne’e hato’o submisaun ba Komisaun F mak hanesan Plan International, Judicial System Monitoring Program (JSMP), United Nations Children’s Fund (UNICEF), Organizasaun Internasionál ba Traballu (OIT) no Parlamentu Foinsa’e.

Molok elabora relatóriu pareser, Komisaun F rona opiniaun hosi Ministériu Solidariedade Sosiál (MSSI), JSMP, UNICEF, OIT, Plan International no Parlamentu Foinsa’e.

Jornalista : Nelia Fernandes

Editora     : Julia Chatarina

HAKEREK NO HATÁN

Please enter your comment!
Please enter your name here