Komunidade simu hela vasina Sinovac doze daruak iha klínika Fatumeta, kinta (08/07/21). Imajen Tatoli/António Gonçalves.

OÉ-CUSSE, 06 setembro 2021 (TATOLI)—Populasaun iha Rejiaun Administrativa Espesiál Oé-Cusse Ambeno (RAEOA) iha sub-rejiaun Nitibe, Oésilo, Pante Makasar no Passabe, ho idade 18 ba leten ho komorbilidade 81,2% mak simu ona vasina AstraZeneca.

Notísia Relevante: Populasaun RAEOA 6.091 simu ona vasina AstraZeneca

“Ita-nia kobertura vasinasaun to’o agora atinje ona 81,2%, tanba tuir trajetu RAEOA tenke fó vasina ba ema 41.442. Dauudaun ne’e, populasaun sira-ne’ebé simu ona vasina AstraZeneca hamutuk 33.650 (81,2%) no seidauk simu vasina hamutuk 7,791 (18,8%), no simu ona vasina doze kompletu atinje ona 15,6%,” Sekretáriu Rejionál Asuntu Saúde, Manuel da Costa, informa ba Agênsia Tatoli iha Sikluli, Oé-Cusse, segunda ne’e.

Dadus hirak ne’e, rezultadu kobertura sa’e maka’as no fó impaktu pozitivu ba komunidade sira-ne’ebé afetadu ba COVID-19, tanba to’o ohin kazu pozitivu komesa menus no 15,6% mak hetan ona doze kompletu iha vasina AstraZeneca no vasina Sinovac.

Maske durante ne’e Governu aplika hela serka sanitária no Estadu Emerjensia maibé partisipasaun komunidade iha programa vasinasauun ne’e di’ak tebes, no sira iha entuziasmu atu hakbesik-aan ba fasiidade saúde ba sentru vasinasaun.

Aleinde ne’e, pesoál saúde sira -hotu simu kompletu ona no servisu saúde kontinua orienta nafatin ba postu saúde no sentru saúde sira atu kontinua enkoraza komunidade, atu hakbesik aan ba fasilidade saúde hodi hetan vasina ho gratuitamente.

Nia apela ba komunidade kontinua kumpre regulamentu protoku hosi Organizasaun Saúde Mundiál (OMS) hodi, kontinua uza máskara, fase liman bebeik, no labele halibur ema barak no suspende serimónia kulturál nune’e bele prevene-aan hosi moras COVID-19.

Notísia Relevante: COVID-19 iha RAEOA: pozitivu na’in-haat no ativu 53

Jornalista : Abílio Elo Nini

HAKEREK NO HATÁN

Please enter your comment!
Please enter your name here