Prezidente Konsellu Radio Komunidade Defisiénte, Gaspar Afonso. Imajen Tatoli/Francisco Sony.

DILI, 03 setembru 2021 (TATOLI)—Diretór Ezekutivu Asosiasaun Halibur Defisiénsia Matan Timor-Leste (AHDMTL), Gaspar Afonso, hateten konfinamentu domisiliáriu ne’ebé Governu implementa prejudika AHDMTL nia atividade servisu no atividade hotu-hotu ne’ebé planea ona ba tinan ida-ne’e.

Notísia Relevante: Governu aloka millaun $1.2 ba Instituisaun Solidaridade Sosiál

“Bainhira konfinamentu domisiliáriu hela de’it mak sei prejudika fundu ne’ebé Governu fó ba ita atu hala’o atividade no programa ne’ebé trasa ona no hein atu implementa ne’e,” Gaspar Afonso hateten ba Agência TATOLI, liuhosi telefónika, sesta ne’e.

Tuir loloos ne’e Governu tenke halo análiza no sukat atu oinsá atividade ka programa ruma iha instituisaun ka organizasaun sira bele la’o, se lae tinan ne’e sei lahalo buat ida tanba aokika hela de’it konfinamentu domisiliáriu.

Nune’e mós, dkona-bá desizaun no regra ne’ebé Governu hasai katak vasina dala-rua bele la’o livre ne’e agora labele garante, tanba mosu tan desizaun foun hosi Governu katak vasina dala-rua mós seidauk bele garante atu la’o livre ne’e, povu atu fiar ida-ne’ebé mak loos.

“Ida-ne’e hamosu no aumenta konfuzaun ba povu liu-liu povu ne’ebé laiha kuñesimentu kle’an. Tanba ne’e, bainhira atu foto desizaun karik presiza análiza no tetu halo didi’ak, nune’e labele fó konfuzaun ba povu,” nia dehan.

Maske nune’e, nia informa, to’o oras ne’e membru Asosiasaun Halibur Defisiénsia Matan Timor-Leste (AHDMTL) hamutuk 60-resin ne’e, kontribui hodi simu hotu ona vasina kompleta ka simu vasina doze daruak.

“Ami obedese no ami hakarak kontribui ba rai ida-ne’e tanba ita hotu iha lei nia okos, entaun tenke kumpre regra ne’ebé estabelese ona,” Gaspar haktuir.

Gaspar hateten, durante Governu implementa konfinamentu obrigatóriu ne’e, edifísiu Asosiasaun Halibur Defisiénsia Matan Timor-Leste (AHDMTL) ne’e taka no laiha atividade servisu.

Notísia Relevante: Konfinamentu domisiliáriu Dili mantein to’o 09 setembru, hakotu iha Ermera

Jornalista : Osória Marques

Editór        : Cancio Ximenes

HAKEREK NO HATÁN

Please enter your comment!
Please enter your name here