Diretor Jeral MSSI, Rui Manuel Gago Exposto

DILI, 17 agostu 2021 (TATOLI)—Governu liuhosi Ministra Solidaridade Sosiál no Inkluzaun (MSSI), tersa ne’e asina akordu ho Instituisaun Solidaridade Sosiál (ISS) 26 ba utilidade sosiál nian no aloka orsamentu millaun $1.2.

“Durante prosesu ne’e, ita konsege finaliza instituisaun 26 ne’ebé hetan ona aprovasaun ba sira-nia proposta ho montante orsamentu ba hamutuk millaun $1.2 ($1.213.755,88),” Diretór Jerál MSSI, Ruui Manuel gago Exposto, hateten iha nia diskursu iha serimónia asina akordu, iha salaun MSSI, Caicoli, Dili.

Hosi instituisaun 26 ne’e, nia dehan, kompostu hosi Sentru Komunitária sira, Uma Mahon sira, instituisaun ne’ebé haree ba área defisiénsia iha neen (6) no orfonatu rua (2), hela instituisaun tolu (3) mak sei hela faze prosesu diskusaun ba sira-nia proposta.

MSSI kontinua enkoraja ba instituisaun solidaridade sosiál sira hotu atu kumpre obrigasaun hotu-hotu liu-liu instituisaun ne’ebé ligadu ho administrativa hanesan administrasaun relatóriu tenke tuir kalendáriu ne’ebé mak iha no mellora jestaun iha ida-idak ninian.

Tanba aplikasaun dekretu lei ne’e, nia dehan, iha futuru sei iha regra ne’ebé rigorozu liután no bele sai hanesan instrumentu ida-ne’ebé mak halo evaluasaun ba implementasaun ba programa hotu-hotu ne’ebe aposta iha proposta.

Hahú hosi estatutu utilidade sosiál sira, Diretór MSSI hateten futuru MSSI sei kria instrumentu ida ba prosesu utilizasaun iha instituisaun ida-idak nian no iha posibilidade MSSI foti asaun rigorozu, bainhira instituisaun ida identifika katak viola regra ne’ebé dekretu lei nú 25/2017 mensiona ona.

“Ha’u la dezafia maibé ha’u enkoraja ita-boot sira atu iha ezekusaun orsamentu tenke transparante no mós programa ne’ebé hakerek ona iha ita-boot sira-nia proposta ne’e. Karik iha mudansa ruma bele konsulta ho MSSI hodi foti desizaun ne’ebé koletivu tanba bainhira ita-boot foti mesak mak sei prejudika ita-boot sira-nia proposta,” nia hateten.

MSSI selebra asina akordu ho ISS tanba bazea ba dekretu lei nú 25/2017 kona-bá rejimentu MSSI nian, nune’e hahú tinan ida-ne’e MSSI aplika dekretu lei nú 25/2017 ba instituisaun solidaridade sosiál sira-ne’ebé mak hakarak halo rekerementu ba iha estatutu hodi fó apoiu ba maluk sira-ne’ebé presiza tulun.

Maibé, nia dehan, tuir loloos rejime no dekretu lei aplika iha tinan 2020 tanba ho situasaun COVID-19 mak MSSI la konsege maibé MSSI halo preparasaun ba instrumentu hotu-hotu atu oinsá instituisaun solidaridade ida hetan atribuisaun ba estatutu utilidade sosiál nian.

“Ita loke prosesu rekerementu ba instituisaun hahú iha novembru 2020 to’o mai jullu 2021 no instituisaun 30 mak hatama rekerementu. Hosi instituisaun 30 ne’e, 29 mak rekendidu no agora dauudaun públika ona iha Jornál Repúblika ne’ebé sai hanesan estatutu utilidade sosiál,” Gago esklarese.

Iha instituisaun ida mak indeferidu tanba la prenxe rekezitu tuir dekretu lei nú 25/2017 nian. Hosi 29 ne’ebé hetan ona estatutu utilidade sosiál ne’e, sira hatama mós proposta orsamentu ba tinan 2021 nian.

Hosi proposta ne’e MSSI kria nia ekipa evaluasaun ida mós involve Provedória Direitu Umanu no Justisa (PDHJ), Gabinete Primeiru-Ministru, Sosiedade Sivíl no Komisaun Direitu Labarik hanesan observadór ba prosesu evaluasaun proposta instituisaun sira-ne’e.

Diretór Ezekutivu Asosiasaun Halibur Defisiénsia Matan Timor-Leste (AHDMTL), Gaspar Afonso hatete tinan AHDMTL hetan osan $63.296 no osan ne’e ba programa advokásia, edukasaun, kapasitasaun no ba apoiu kustu operasionál.

“Osan ida-ne’e la sufisiénte ba ami-nia programa tanba programa barak mak elimina no ita asina akordu ne’e iha tiha fulan agostu maibé loloos ne’e marsu, nune’e ita bele hala’o atividade sira. Nune’e mós fundu ne’ebé atu transfere ne’e sei han tempu tan,” nia dehan.

AHDMTL rekomenda ba Governu atu haree situasaun ne’e, maibé antes ne’e AHDMTL halo karta ba Parlamentu Nasionál, Primeiru-Ministru Taur Matan Ruak, atu nune’e ba futuru orsamentu ba instituisaun solidaridade sosiál sira-ne’e tenke aumenta ba millaun $2 hanesan ne’e.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here