iklan

DILI, HEADLINE, POLÍTIKA

Akizisaun ekipamentu eleitorál sei uza ba eleisaun-resensiamentu eleitorál

Akizisaun ekipamentu eleitorál sei uza ba eleisaun-resensiamentu eleitorál

Diretór Jerál Sekretariadu Tékniku Administrasaun Eleitoral (STAE), Acilino Manuel Branco. Imajen TATOLI/Egas Cristóvão.

DILI, 02 setembru 2021 (TATOLI)—Diretór Jerál Sekretáriu Tékniku Administrasaun Eleitorál (STAE), Acilino Manuel Branco, hateten akizisaun ekipamentu eleitorál sei uza ba eleisaun no resensiamentu eleitorál iha rai-laran no rai-li’ur.

Notísia Relevante: Governu prevee orsamentu akizisaun materiál eleitorál besik millaun $2

Nia hateten prosesu akizisaun liuhosi prosesu aprovizionamentu iha Ministériu Administrasaun Estatál (MAE), utlizadór ba prosesu sira-ne’e mak STAE atu lori halo atividade sira-ne’e no sei responde ba atividade eleisaun no resensiamentu eleitorál nian.

“Ba atividade eleisaun nian mak kabina votu nian distribui tiha ona ba munisípiu sira. Ita-nia planu mai fazeadamente maibé tuir kontratu liuhosi aprovizionamentu to’o mai antes prosesu pagamentu ba aprovizionamentu taka. Ne’ebé, ita hanoin katak pelumenus iha outubru no novembru hanesan ne’e, sasán sira-ne’e bele kompletu ona. Sasán hanesan materiál sira-ne’ebé sei uza iha loron eleisaun nian, karimbu, tinta, kamizola ba ofisiál sira atu hatais, urna no seluk tan. Sasán hirak ne’e mak ita sei uza ba eleisaun nian,” Acilino Manuel Branco hateten ba Agência TATOLI, iha nia knaar fatin, Vera Crus, Dili, kinta ne’e.

Parte seluk, nia dehan materiál ba resensiamentu eleitorál nian mak ekipamentu informátika sira no mós blanku kartaun nian inklui ninia elementu balun tán ba resensiamentu eleitorál nian.

“Sasán hirak ne’e balun to’o ona no balun seidauk. No sasán ne’ebé to’o ona mak ita haruka ona ba postu balun iha munisípiu hodi uza daudaun ona. Iha tempu badak sei to’o tán mai, nune’e reforsa tán ba fatin móvel sira iha Dili liu-liu ba iha universidade sira inklui lori reforsa ba diaspora,” nia dehan.

Diretór STAE ne’e hatutan, dala ruma mákina la augenta tanba loron ida bele halo kartaun ba ema 200 entaun ho kuantidade ne’e presiza mákina adisionál, nune’e bele fasilita di’ak liután no prosesu akizisaun hodi atende ba sidadaun sira la’o hela.

Kona-ba rai-liur nian, nia dehan, ekipa tékniku kontinua uza sasán ne’ebé antes ne’e uza iha ne’ebá ne’e maibé parte téknika sei ba haree no halo teste karik iha sasán balun aat ona mak sei aumenta tan ekipamentu sira.

Notísia Relevante: CNE-STAE halo levantamentu ba empreza gráfika atu emprime bulletin votu

Jornalista : Osória Marques

Editór      : Cancio Ximenes

iklan
iklan

Leave a Reply

iklan
error: Content is protected !!