Diretór Jeral Sekretariadu Tékniku Administrasaun Eleitoral (STAE), Acilino Branco. Imajen Tatoli/Egas Cristovão.

DILI, 10 agostu 2021 (TATOLI)— Ministériu Negósiu Estranjeiru no Kooperasaun  (MNEK) propoin atu kria atendimentu movel relasiona ho resenseamentu eleitorál iha diaspora.

“Atendimentu resenseamentu eleitorál só bele halo de’it iha embaixada sira, maibé realidade ita-nia sidadaun sira hela dook hosi fatin sira-ne’ebé atu halo resenseamentu, nune’e MNEK propoin atu estabelese mós fatin atendimentu movel iha diaspora. Fatin movel ne’e sei tau iha fatin ne’ebé mak ita-nia sidadaun sira halo konsentrasaun,” Diretór Jerál Sekretariadu Tékniku Administrasaun Eleitoral (STAE), Acilino Manuel Branco, informa ba Agência Tatoli iha nia knaar fatin, Dili, tersa ne’e.

Acilino hateten, resenseamentu eleitorál sei halo iha embaixada no atendimentu movel sei halo iha Kwangju. Iha Portugal resenseamentu iha Lizboa ba atendimentu movel iha postu nian. Austrália nian iha Darwin no atendimentu iha Melbourn Sidney no Kingsland. Iha Reinu Unidu halo atendimentu iha Londres no movel iha fatin haat.

 Tuir nia, planu ka hanoin atu estabelese tan atendimentu movel ne’e atu fasilita sidadaun sira ne’ebé mak hela dook hosi embaixada Timor-Leste nian iha nasaun refere.

“Téknikamente iha ona koordenasaun tékniku ho MNEK no mós ho Komisaun Nasionál Eleisaun (CNE),” nia tenik tan.

Nia dehan, tuir planu katak ekipa sei dezloka iha agostu nia-laran. Maibé sei haree ba kestaun tékniku sira inklui konesaun aviaun nian no haree mós ba regra ne’ebé mak estabelese iha nasaun ne’ebé mak sei dezloka ba. Nune’e iha loron 03 agostu to’o iha 14 janeiru 2022, ekipa halo de’it ona resenseamentu eleitorál ne’e.

Kona-ba ekipa ne’ebé mak dezloka, nia dehan, haree ba lei resenseamentu iha diaspora ne’e MNEK no asuntu tékniku eleitorál ne’e mak STAE no CNE mak hola parte iha edukasaun sívika. Ho ida-ne’e mak bele halo sensibilizasaun ba sidadaun sira hodi lori ba prosesu resenseamentu.

Kona-ba pesoál STAE nian, Acilino  hateten,  STAE iha planu no trasa másimu ema na’in-rua. Iha ema ida nia iha koñesimentu informátika nian, liuliu lista mobilidade no seluk mak tenke iha koñesimentu kona-ba legál nian hanesan resenseamentu hodi halo edukasaun votante.

“Prosesu hotu la’o no tuir nia mekanizmu no rezultadu ne’ebé ita simu no ho nia atendimentu progresu ba partisipasaun sidadaun nian ne’ebé to’o agora rejistu iha baze dadus hamutuk 840.991, ne’e inklui ona ho sidadaun ne’ebé mak rejistu foun no atualizasaun nian,” nia tenik.

Osan ne’ebé prevee ba STAE mak kuaze millaun $3-resin no osan ne’e mak STAE hodi halo atividade resenseamentu eleitorál iha rai-laran no rai-li’ur nian, inklui ba sosa ekipamentu eleisaun nian no ba pagamentu ba asisténsia tékniku no operadora tékniku nian ho mós ba saláriu vensimentu ba funsionáriu sira.

Jornalista   : Osória Marques

Editór        : Francisco Simões

HAKEREK NO HATÁN

Please enter your comment!
Please enter your name here