Deputado FRETILIN, Joaquim dos Santos. Imajen Tatoli/Egas Cristóvão

DILI, 23 agostu 2021 (TATOLI)—Komisaun A ne’ebé trata asuntu Konstitusionál no Justisa aprova ona projetu-lei eleitorál munisipál iha faze espesialidade iha munisípiu Aileu.

Notísia Relevante: PN aprova projetu-lei eleitorál munisipál-podér lokál iha jeneralidade

“Artigu sira hosi projetu-lei eleitorál munisipál ne’e ami aprova ona iha semana kotuk. Hein tama fali hosi resesu, sei hatama fali relatóriu no paresér kona-ba diskusaun espesialidade projetu-lei eleitorál munisipál ba meza prezidénsia depois Prezidente Parlamentu Nasionál mak iha kompeténsia halo ajendamentu hodi halo aprovasaun iha finál globál,” Prezidente Komisaun A, Joaquim dos Santos, informa ba jornalista sira, iha uma fukun, segunda ne’e.

Iha projetu-lei eleitorál munisipál define mekanizmu atu sidadaun sira iha direitu polítiku atu partisipa iha eleisaun ba deputadu lokál no eleisaun ba prezidente kámara iha munisípiu sira.

Nune’e mós, iha projetu-lei ne’e mós regula kompeténsia Governu Sentrál nian ligadu ba kompeténsia ne’ebé atribui ba munisípiu sira.

“Maibé fazeadamente Governu Sentral kria kondisaun ba munisípiu sira, bele prepara eleisaun ida di’ak ba munisípiu sira-ne’ebé prontu ona. Munisípiu sira-ne’ebé seidauk prontu prepara-an tanba lei ne’e nakloke, depende Governu prepara kondisaun hodi desentraliza podér ne’e tanba desentralizasaun podér ne’e konstitusionál,” nia dehan.

Tuir nia, Konstituisaun impera katak desentralizasaun tenke la’o ho lei, tanba ne’e mak uma fukun hamosu projetu-lei podér lokál no desentralizasaun administrativu no projetu-lei eleitorál munisipál.

“Projetu-lei rua ne’e komisaun aprova ona iha espesialidade,” nia dehan.

Nia hateten, totál deputadu lokál ne’e depende ba eleitór hosi kada munisípiu tanba estandarte ne’e rihun 50, no rihun 50 mai kraik iha deputadu 13, rihun 50 ba leten másimu deputadu 21 iha kámara munisipál tanba orsida órgaun eleitorál sira sei haree ida-ne’e.

Ezemplu, nia dehan, bainhira Ataúro sai munisípiu espesiál iha 2022 no 2023 mak realiza eleisaun maibé totál populasaun lato’o rihun 50, entre rihun-lima (5000) entaun nia bele hetan kadeira deputadu ne’e 13 de’it.

Notísia Relevante: Komisaun A aprova relatóriu-paresér ba projetu-lei eleitorál munisipál

Jornalista : Evaristo Soares Martins

Editór         : Cancio Ximenes

HAKEREK NO HATÁN

Please enter your comment!
Please enter your name here