Diretór Ezekutivu ANAAA, Edmundo Viegas. Imajen Tatoli/Nelia Fernandes.

DILI23 agostu 2021 (TATOLI)—Diretór Ajénsia Nasionál Avaliasaun Akreditasaun Akadémiku (ANAAA), Edmundo Viegas da Silva informa, segunda ne’e ANAAA kontinua halo avaliasaun no akreditasaun ba kursu rua iha Institutu Superiór Cristál (ISC).

Notísia Relevante: ANAAA hahú avalia kursu 24 hosi Ensinu Superiór hitu

“Ohin, ami hahú fali halo avaliasaun iha Institutu Superiór Cristál (ISC) hodi avalia kursu rua mak enfarmajen no parteira,” Edmundo Viegas da Silva, hateten ba Agência Tatoli, iha nia knaar-fatin, INFORDEPE, Dili.

Bainhira avaliasaun ba kursu rua ne’e ramata ona mak iha kuarta (25/08) ANAAA sei fila-fali ba UNITAL hodi halo avaliasaun ba kursu balun ne’ebéseidauk avalia.

“Iha loron 25-30 agostu ne’e sei halo avaliasaun iha UNITAL. Ezemplu, iha loron 30-31 agostu ne’e halo avaliasaun ba kursu farmasia iha UNTL mak la’o hanesan ho UNITAL nian,” nia dehan.

Avaliasaun ne’ebé ANAAA hala’o iha UNITAL ne’e hala’o ba kursu tolu ona no ohin avalia tan kursu ida iha Institutu Superiór Cristál (ISC), entaun ANAAA avalia ona kursu haat no sei falta kursu 20.

“Avaliasaun no akreditasaun ba kursu 24, ami sei ramata iha fim setembru. Iha outubru no novembru ne’e, ami foku ba fali halo akreditasaun ba instituisaun,” nia hateten.

Iha tinan ne’e, ANAAA halo avaliasaun no akreditasaun ba grupu objetu rua (2) hanesan grupu kursu no instituisaun. Ba kursu nian hamutuk 24 no instituisaun hamutuk ualu (8), no ba instituisaun ualu ne’e mak inklui Institutu Superiór Cristál (ISC).

“Ohin dadeersan, ha’u akompaña ami-nia ekipa ba iha ISC. Aproveita fó mós hanoin ba ISC hodi prepara sira-nia relatóriu avaliasaun ba instituisaun nian, nune’e iha setembru nia laran ne’e sira finaliza ona no outubru ami bele tun tan,” nia haktuir.

Avaliasaun no akreditasaun ba kursu 24 hosi ensinu supérior hitu (7) ne’e hahú iha UNITAL iha loron 16 no 17 agostu hodi halo avaliasaun ba kursu floresta, depois nafatin ho UNITAL iha loron 18 no 19 agostu halo avaliasauun ba kursu peskas.

“Iha loron 20 no 21, ANAAA halo avaliasaun ba ho kursu enfarmajen iha UNITAL. Purtantu, UNITAL nian sei kontinua fali iha loron 25 agostu, iha kuarta no kinta ho kursu direitu, hafoin kontinua kedas ho loron sesta-sábadu (27-28 agostu) ne’e ho kursu lisensiatura ba administrasaun públika,” nia hateten.

Iha loron 30 no 31 agostu, ANAAA sei halo avaliasaun ba kursu saúde públika lisensiatura iha UNITAL no sei finaliza iha loron 23-24 fulan-setembru ne’e sei halo avaliasaun ba kursu komunikasaun sosiál iha UNITAL.

Rezultadu avaliasaun ba kursu 24 ne’e, sei fó sai dala ida bainhira avaliasaun hirak ne’e finaliza hotu ona.

Notísia Relevante: Fulan oin, ANAAA hahú halo avaliasaun no akreditasaun ba instituisaun ualu

Jornalista : Nelia Fernandes

Editór      : Cancio Ximenes

HAKEREK NO HATÁN

Please enter your comment!
Please enter your name here