Diretór Ezekutivu ANAAA, Edmundo Viegas. Imajen Tatoli/Nelia Fernandes.

DILI, 04 juñu 2021 (TATOLI)—Ajénsia Nasionál Avaliasaun Akreditasaun Akadémika (ANAAA), tuir planu iha fulan jullu tinan 2021 sei halo avaliasaun no akreditasaun institusionál ba dala-tolu ba instituisaun ualu (8) iha Timor-Leste.

Diretór Ezekutivu ANAAA, Edmundo Viegas, hateten institutuisaun ualu (8) ne’e tenke tuir fali akreditasaun institusionál, tanba besik kompleta ona tinan lima no presiza halo hikas avaliasaun ba sira.

Notísia Relevante: ANAAA Ejize Universidade Sira Investe Maka’as iha Rekursu Umanu

“Tuir ami-nia planu, ami sei halo lansamentu ba avaliasaun no akreditasaun institusionál ba dala-tolu ba instituisaun ualu ne’e iha fulan jullu, fulan oin,” Edmundo Viegas hateten Agência Tatoli, iha nia knar fatin, Balide, Dili, sesta ne’e.

Instituisaun ualu ne’ebé mak oras ne’e daudaun prepara hela sira-nia relatóriu hahú kedas iha fulan janeiru 2021 ne’e, ANAAA halo ona kontaktu ho sira hodi prepara programa estudu 34  kursu programatiku ba baxarelatu, maestradu hamutuk no iha nível institusional iha instituisaun ualu, ne’ebé to’o ona prazu ba sira atu tuir fali akreditasaun institusionál ba dala tolu.

“Sira-nia akreditasaun ikus iha 2015, sira-nia prazu mate tiha ona iha 2020. Tanba kada tinan lima-lima ne’e tenke avalia no akredita fali,” nia dehan.

Senáriu ANAAA otimista katak bele hahú ona halo avaliasaun ne’e iha jullu fulan oin, hodi nune’e prevee iha fulan haat to’o lima hanesan hosi jullu-novembru ne’e, para halo avaliasaun ne’e ramata.

Hosi ANAAA nia Sekretáriadu Tekniku nia relatóriu, nia dehan, iha kursu balun ne’ebé sira kuaze finaliza ona sira-nia relatóriu 90% no 95%.

“Ami fiar katak, ami bele hahú ona halo avaliasaun programatíku no institusionál hahú ona iha fulan jullu,” nia dehan.  

Instituisaun ualu ne’ebé atu avalia no akredita mak hanesan Universidade Nacional Timor Lorosa’e (UNTL), Universidade da Paz (UNPAZ), Institute of Business (IOB), Institute of Tecnology (DIT), Institutu Profisionál de Canossa (IPDC), Institutu Superior Cristal (ISC), Institutu Siénsia Relijioza (ICR) Lahane, no Instituto Katólika Formasaun Profesores (ICFP) Baucau.

Diretór Ezekutivu ANAAA, Edmundo Viegas. Imajen Tatoli/Nelia Fernandes.

“Instituisaun ualu ne’e mak ita sei avalia no akredita fali ba dala tolu. Sira akredita ba dahuluk iha 2008 no 2009, no akredita segundu iha 2015. Tuir planu loloos ne’e, iha 2020 ne’e sira tenke akredita fali maibé tanba tinan uluk ami la konsege, ami prolonga sira-nia estatutu akreditasaun ba tinan ida no 2021 ne’e ramata ona. Purtantu 2021 ne’e, sira tenke tuir fali akreditasaun,” nia afirma.

Kona ba kursu 34, Edmundu Viegas esplika, barak liu husi UNTL no Universidade Oriental Timor-Lorosa’e (UNITAL) tanba UNITAL sei iha 15 kursu ne’ebé seidauk tuir avaliasaun no akreditasaun. 

“Iha lista 34 kursu ne’ebé ami simu, iha kursu Maestradu ualu (8) no Post Graduasaun ida. Hosi UNTL iha maestradu haat (4) no post graduasaun ida. DIT iha maestradu ida, UNPAZ iha maestradu tolu. Purtantu kursu sia ne’e mak ami simu ona iha nível post-graduasaun no maestradu nian,” nia informa.

Aleonde iha nível lisensiatura no baxarelatu, ANAAA simu kursu 25 barak liuhosi UNTL iha kursu neen (6) hanesan Farmasia, Nutrisaun, Komunikasaun Sosiál, Relasaun Internasionál, Língua Tetum no Reakreditasaun ba Baxarelatu, em Edukasaun Fisika Desportu ne’ebé uluk la pasa.

“Portantu tinan ne’e ami reakredita fali kursu,” nia tenik.

Iha UNITAL, iha kursu hitu mak hanesan Direitu, Floresta, Peska, Administrasaun Públika, Komunikasaun Sosiál, Enfarmajen no Saúde Públika, UNDIL iha rua (2) mak hanesan Enfarmajen Dentaria no Saúde Públika, UNPAZ rua (2) mak hanesan Estudu da Paz Seguransa no Enjeñaria Civil, no ikus liu Cristal iha rua (2) mak hanesan Enfarmajen no Parteira.

“Sira ne’ebé mak lista ami simu hamutuk 34 kursu, no oras ne’e daudaun ami prepara hela sira atu tuir avaliasaun no akreditasaun entre jullu to’o novembru,” Edmundu Viegas dehan.

Notísia Relevante: ANAAA avalia ona kursu 105, ida taka

Jornalista: Nelia Fernandes

Editór: Cancio Ximenes

HAKEREK NO HATÁN

Please enter your comment!
Please enter your name here