Vise-Prezidente Parlamentu Nasionál, Maria Angelina Lopes Sarmento. Imajen Tatoli/Egas Cristóvão

DILI, 08 jullu 2021 (TATOLI)—Reprezentante povu iha uma fukun Parlamentu Nasionál (PN) sei halo diskusaun kle’an ba proposta-lei enkuadramentu orsamentál tanba lejizlasaun ne’e nu’udar fuan no raan ba Estadu Timor-Leste iha ezekusaun orsamentu jerál estadu.

Vise-Prezidente Parlamentu Nasionál, Deputada Maria Angelina Lopes Sarmento, konsidera proposta-lei foun ne’e presiza deskute kle’an tanba halo revizaun ba lei estruturante (lei númeru 13/2009 kona-ba Lei Orsamentu no Jestaun Finanseira (LOGF-sigla portugés).

Notísia Relevante: PN aprova proposta-lei enkudramentu orsamentál iha jeneralidade

“Iha debate espesialidade mak ami sei diskute kle’an hodi hadi’a di’ak liután proposta-lei ne’e liuhosi papél deputadu sira-nian nu’udar lejizladór atu halo proposta hodi altera lei ne’e, nune’e lei sai produtu ida-ne’ebé iha kualidade. Tanba, ami iha responsabilidade atu fó produtu di’ak ba Governu hodi ezekuta lei ne’e ho di’ak,” Maria Agelina Lopes Sarmento informa ba jornalista sira, iha uma fukun, kinta ne’e.

Reprezentante povu sira seidauk promete bainhira mak debate espesialidade no finál globál iha tempu badak, presiza ita presiza haree no tetu ho didi’ak no halo análize ida-ne’ebé ho profunda, nune’e proposta-lei ne’e sai ba lei ho kualidade.

Impaktu hosi revizaun ba LOGF ne’e sei halo mós alterasaun ba lei sira seluk hanesan lei fundu petrolíferu, lei kontributivu seguransa sosiál, lei ba kriasaun RAEOA, lei ba dívida públika, Lei Organizasaun Funsionamentu Parlamentár (LOFAP) no Rejimentu Parlamentu Nasionál (RPN).

Vise-Prezidente Parlamentu Nasionál ne’e hateten, lei hirak ne’e altera hafoin lei enkuadramentu orsamentál ne’e vigora.

Proposta-lei enkuadramentu orsamentu estadu no jestaun finanseira públika ne’e aprovadu iha jeneralidade ho rezultadu votasaun a-favór 37, kontra 12 no abstensaun 11.

Purtantu, Governu liuhosi Ministériu Finansa propoin halo revizaun ba lei númeru 3/2009 kona-ba Lei Orsamentu no Jestaun Finanseira (LOGF-sigla portugés). Iha proposta-lei foun ne’e mantein artigu hamutuk 16, altera artigu hamutuk 22, retira artigu 17. Entretantu proposta-lei foun ne’e aumenta tán artigu 61 kompara ho lei númeru 13/2009 nune’e proposta-lei foun ne’e iha artigu hamutuk 116 kompara ho artigu 55 iha lei vijente.

Preámbulu hosi proposta-lei foun ne’e introdús ho objetivu prinsipál rua mak ajiliza (agilizar) iha jestaun públika no hasa’e transparénsia, responsabilidade, prestasaun konta, kontrolu serbisu no entidade sira iha setór públiku administrativu.

Hosi objetivu prinsipál rua ne’e mak hamosu prinsípiu sanulu-resin-ida (11) kompostu hosi unidade no universidade, anualidade no plurianualidade, estabilidade no sustentabilidade orsamentál, prinsípiu efikásia ekonomia no efisiénsia, transparénsia, responsabilidade, ekidade interjerasionál, programasaun despeza, espesikasaun no la kompensasaun.

Insituisaun sira-ne’ebé durante audiénsia públika propoin ba Parlamentu Nasionál liuhosi Komisaun C atu diskute kle’an mak hanesan Tribunál Rekursu (TR), Konsellu Konsultivu Fundu Petrolíferu (CCFP-sigla portugés), Forum ONG Timor-Leste (FONGTIL) no La’o Hamutuk (LH) tanba insituisaun hirak ne’e halo análize katak proposta governu nian hakarak halo alterasaun substansiál ba LOGF.

Notísia Relevante: Proposta-lei enkuadramentu orsamentál konsagra ho prinsípiu 11

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here