Prezidente Konsellu Veteranu, Vidal de Jesus "Riak Leman". Imajen TATOLI/Arminda Fonseca.

DILI, 02 agostu 2021 (TATOLI)—Governu liuhosi Ministériu Asuntu Kombatente Libertasaun Nasionál (MAKLN) ho nia ekipa validasaun, aban (tersa, 03/08) sei dezloka ba territóriu Timor-Leste hodi halo verifikasaun ba  Kombatente Libertasaun Nasionál ne’ebé rejista iha tinan 2009 sira-nia dadus.

Notísia Relevante: MAKLN prepara ekipa re-verifika dadus veteranu rejistadu iha 2009

Prezidente Konsellu Veteranu, Vidal de Jesus ‘Riak Leman’, hateten ekipa validasaun sira sei kontinua hala’o servisu iha munisípiu hotu-hotu ba kombatente ka família sira hosi matebian tenke aprezenta-an iha sira-nia moris fatin.

Atu nune’e, nia dehan, bele submete iha prosesu validasaun ba ekipa responsável sira, tuir kalendáriu ba munisípiu ida-idak no tenke aprezenta mós kartaun eleitorál iha fatin validasaun ne’e.

“Aban, ita-nia ekipa sei tún ba munisípiu hotu-hotu atu halo verifikasaun ba veteranu sira-ne’ebé rejistu iha tinan 2009 nian. Tanba uluk ita hala’o tiha ona maibé ita bele dehan 10% de’it karik. Ita labele kontinua verifika dadus tanba Timor-Leste tama ba pandemia to’o ohin loron, entaun atividade hotu-hotu paradu,” Vidal de Jesus ‘Riak Leman’ ba Agência TATOLI, iha nia knaar fatin SERVE, Vila Verde, Dili, segunda ne’e.

Ekipa ne’ebé atu dezloka ba munisípiu ne’e, sira-ne’ebé mak koñese situasaun veteranu sira-nian no hanesan mós estrutura konsellu munisipál nian, tanba parte nasionál anúnsia ona ba Prezidente no Vise-Prezidente Konsellu Munisipál atu partisipa direta ba prosesu verifikasaun dadus ne’e.

Kona-ba veteranu ne’ebé mak mate ona no maske naran taka sai ona, nia dehan, Governu nafatin fó konsiderasaun atu simu direitu hosi saudozu ne’e rasik.

Maibé, tuir nia, saudozu ka saudozu nia inan-aman ka maun-alin no bele mós ba feen-laen mak iha direitu atu bele subtitui fali, tanba Lei la dehan oan haki’ak atu simu fali direitu ida-ne’e.

Nia informa, veteranu iha territótiu nasionál ne’ebé mak rejistu iha tinan 2009 no aban sei halo verifikasaun ne’e hamutuk 124.680.

Liuhosi konteúdu ne’ebé mensiona iha Estatutu Kombatente Libertasaun Nasionál, Lei nú. 3/2006, no artigu 13° “Registo da Qualidade de Combatente da Libertação Nacional” sei kontinua hala’o validasaun rejistu ba períodu daruak nian ba rekoñesimentu hanesan Kombatente Libertasaun Nasionál ne’ebé rejista iha tinan 2009.

Notísia Relevante: Sekretariu Estadu Asuntu Kombatente Kontinua Verifika Dadus Veteranu

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here