Bee-matan Oe-Naek iha aldeia Maunaebeno. Imajen Tatoli/Abilio Elo Nini.

OÉ-CUSSE, 17 agostu 2021 (TATOLI)—Autoridade Rejiaun Administrativa Espesiál Oé-Cusse Ambeno (RAEOA) liuhosi Sekretáriu Rejionál Asuntu Agrikultura identifika ona bee-matan hamutuk 58 hodi konserva iha tinan 2021 ne’e.

Notísia Relevante: Autoridade RAEOA identifika bee-matan Oél-Ulas dada bee ba uma kain 126

“Iha 2020, Oé-Cusse enfrenta krize bee-moos. Atu asegura débitu bee-moos sufisiente ba nesesidade ema-nian, animál no platasasun sira, tinan ne’e Sekretáriu Agrikultura servisu hamutuk ho ONG sira konsege identifika ona bee-matan 58 iha suku 14 no aledia 32 iha RAEOA  atu konserva,” Sekretáriu Rejionál Asuntu Agrikultura, José Eta, informa ba Agência Tatoli, iha Horta, Suku Costa, Sub-Rejiaun Pante Makasar, Oé-Cusse, tersa ne’e.

Daudaun ne’e, nia informa, atividade hala’o iha bee-matan sira mak autoridade nia trajetu radiús iha bee-matan sira persiza rai ektare ida ba leten, entaun hosi totál bee-matan 58 atu konserva ne’e nia medida rai área totál hamutuk ektare 100,99, ne’ebé bele kobre benefisiáriu uma kain 3.735 ne’ebé envolve diretamente iha programa Food For Work.

“Benefisiáriu 3.735 sira-ne’e, autoridade fasilita apoiu foos saka 7.450 ba fulan rua nian. Daudaun ne’e, benfisiáriu sira-ne’e kontribui ona halo lutu haleu bee-matan sira kuaze 95% atu finaliza ona, no hala’o mós atividade seluk hamoos bee-matan sira no kuda ai-oan,” nia dehan.

Atividade ne’e hala’o hetan akompañamentu téknika hosi Sekretáriu Rejionál Agrikultura, no kria ekipa konjunta ida kompostu hosi departamentu hotu-hotu ne’ebé tutela iha Dirasaun Rejionál Agrikultura (DRA) hamutuk na’in-16, atu responsabiliza ba monitorizasaun no halo akompañamentu tékniku iha baze.

Xefe Suku Lela-Ufem Sub-Rejaiun Nitibe, Jose Neno Sila, hato’o agrdesimentu ba autoridade RAEOA tanba tau asuntu bee-moos importante, tanba iha Suku Lela-Ufe bee-matan kuaze 20 iha aldeia haat ne’e tinan barak seidauk konserva, maibé tinan ne’e konsege konserva ona bee-matan 10.

“Iha ha’u-nia suku ne’e, iha bee-matan 10 mak sei konserva. Ida-ne’e, ha’u orgullu tanba bee-matan sira ne’e kuandu autoridade konserva halo didi’ak, iha future, ha’u-na suku sei la susar ona ba bee-moos. Tanba ne’e mak ha’u mobiliza ona komunidade sira hahú halo ona lutu haleu bee-matan sira, agora ami hein de’it programa kontinuasaun,” nia hateten.

Notísia Relevante: Autoridade RAEOA lansa programa “Food for Work” iha área protejida Nitibe

Jornalista : Abílio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here