Bee-matan Oél-Ulas iha aldeia Ulas, suku Taiboko. Imajen Tatoli/Abilio Elo Nini.

OÉ-CUSSE, 02 Jullu 2021 (TATOLI)—Prezidente Autoridade Rejiaun Administrativa Espesial Oé-Cusse Ambeno (RAEOA) akompaña hosi Dirasaun Rejionál Infraestrutura (DRI) identifika bee-matan Oél-Ulas iha aldeia Ulas, suku Taiboko, sub-rejiaun Pante Makasar atu dada bee hodi fornese bee-moos ba uma kain 126

Notísia Relevante: Autoridade RAEOA enkoraja komunidade konserva bee-matan Oé-Naek

“Objetivu hosi identifikasaun bee-matan Oél-Ulas atu dada ba komunidade uma kain 126 ho populasaun 350 iha aldeia Ulas ne’e. Tanba, bainhira dada ona bee-matan ne’e ba populasuan to’o iha sira-nia hela fatin, autoridade sei konstrui eskola ida, postu saúde ida no mellora estrada iha aldeia Ulas ba suku Taiboko,” Prezidente RAEOA, Arsénio Paixão Bano, hateten ba populasaun sira sira bainhira hasoru malu ho populasaun sira iha aldeia Ulas, sesta ne’e

Nia hateten, suku ne’ebé mak susar liu ba bee-moos mak suku Taiboko maibé atu dada bee-moos hosi bee-matan ne’e lia-na’in sira lakohi atu dada tanba dehan bee-matan ne’e lulik, maibe autoridade husu nafatin atu dada bee ne’e ba sira-nia aldeia rasik la’ós dada ba suku seluk.

Prezidente RAEOA, Arsénio Paixão Bano, dada-lia ho populasaun aldeia Ulas, Suku Taiboko, iha bee-matan Oél-Ulas. Imajen Tatoli/Abilio Elo Nini.

“Ohin, ami mai husu imi, bee-moos ne’e importante ba ema hotu. Imi mai kuru bee iha bee-matan sira dookliu la’o kuaze kilometru tolu (3). Tanba ne’e mak ohin autoridade mai direta atu haree oinsá bele ajuda dada bee hosi imi-nia bee-matan ne’e ba besik imi-nia hela fatin, tanba autoridade sei iha polítika ida atu halo dezenvolvimentu iha imi-nia suku,” nia dehan.

Prezidente autoridade apela ba komunidade Ulas atu kontribui servisu hamutuk ho autoridade, nune’e bele tulun komunidade bele asesu bee-moos, tanba iha tempu badak autoridade sei haruka ekipa tékniku sira atu sukat, nune’e tama ba planu dada bee-moos nian iha tinan ne’e

Entretantu Xefe aldeia Ulas, Agostinho Mala, hato’o agradese ba vizita Prezidente Autoridade RAEOA tanba identifika ona fatin sira-ne’e, atu bele ajuda komunidade Ulas nia problema ne’ebé durante ne’e kuru bee tenke la’o ba fatin dook.

“Ami kontente tanba ohin autoridade sira haree ami nia bee-matan ne’e. Tanba, durante ami bee-moos la susar maibe ba kuru dook liu, entaun karik dada duni ona, bele hamenus ami-nia problema. Kona-ba harii eskola ne’e imporante duni, tanba ami-nia oan sira balun la eskola tanba eskola dook liu,” Xefe aldeia ne’e hateten

Jornalista : Abilio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here