PA RAEOA, Arsénio Paixão Bano, halo lansamentu ba programa Food for Work hodi halo lutu haleu área protezida. Imajen/RAEOA-ZEESM.

OÉ-CUSSE, 15 jullu 2021 (TATOLI)—Autoridade Rejiaun Administrativa Espesiál Oé-Cusse Ambeno (RAEOA) liuhosi Sekretáriu Rejionál Asuntu Agríkultura Departementu Floresta Konservasaun, kuarta (15/07) horisehik ofisiálmente lansa programa Food for Work hodi halo lutu haleu bee-matan Oélpam área protejida ektare rua iha Suku Lela-Ufe, Sub-Rejiaun Nitibe.

Prezidente Autoridade RAEOA, Arsénio Paixão Bano, hateten programa ne’e hala’o atu konserva bee-matan 16 ne’ebé kobre ba benefisiáriu uma kain 1.172 iha suku 12 iha sub-rejiaun Nitibe, Oésilo, Pante Makasar no Pasabe.

Notísia Relevante: Autoridade RAEOA identifika bee-matan Oél-Ulas dada bee ba uma kain 126

“Programa konserva bee-matan sira-ne’e hodi prezerva bee ba ita-nia komunidade iha área remota. Tanba, Oé-Cusse tinan barak hetan problema kona-ba bee-moos. Entaun, autoridade tau asuntu bee-moos ne’e sai prioridade iha RAEOA,” Prezidente Autoridade RAEOA, Arsénio Paixão Bano, informa ba Agência Tatoli liuhosi telefónika, kinta ne’e

Aliende ne’e, autoridade fasilita apoiu ai-han ba komunidade atu apoiu servisu nune’e bele hadi’a kondisaun amibiente sira-ne’ebé besik iha bee-matan.

Autoridade husu ba komunidade atu apoiu tanba involvimentu komunidade importante ba sustentabilidade ba programa ne’e, tanba programa Food For Work nia benefísiu sei ba direta komunidade no rezultadu ikus ba konserva bee-moos ne’e, la’ós ba komunidade de’it maibe inklui mós animál nomós ba agrikultór kuda modo sira.

Entretantu Sekretáriu Rejionál Asuntu Agríkultura, José Eta, hateten lansamentu ne’e foku liu ba konstrusaun bee-matan sira tanba tuir planu iha tinan 2021 ne’e atu halo konservasaun ba bee-matan (haat) no kada sub-rejiaun bee-matan ida, tanba durante ne’e autoridade sempre distribui bee-moos ba komunidade uza karreta tanke nian,

“Konservasaun ba bee-matan sira ho ninia radiús ba área konservasaun ektare rua (2), entaun apoiu ne’ebé mak autoridade fasilita ba benefisiáriu sira foos ba fulan rua ninian hamutuk tonelada 85 por volta 3.404 ba uma kain 1.172,” nia informa.

Identifikasaun bee-matan sira iha suku 12 mak hanesan iha sub-rejiaun Oésilo, suku Bobometo, Uistasae no Uistaqueno, iha sub-rejiaun Pasabe iha suku Malelat no Abani, sub-rejiaun Nitibe iha suku Uistaco, Lela-Ufe, Suni-Ufe no iha sub-rejiaun Pante Makasar mak suku Taiboko, Naimeco, Costa no suku Cunha, maibé sei iha posibilidade sei aumenta

Iha biban ne’e Xefe suku Lela-Ufe, sub-rejiaun Nitibe, José Neno Sila, agradese ba autoridade tanba halo ona lansamentu konservasaun bee-matan iha Oélpam, iha aldeia Hau-Ufe, suku Lela-Ufe, nune’e bele fornese ona bee-moos ba uma kain 170.

“Ami agradese ba autoridade tanba hanoin nia povu sira iha área remota. Ami agradese tanba ami iha suku ne’e iha bee-matan Oélpan nunka maran iha tempu bailoron. Komunidade mós kontente no konsege oferese sira-nia rai no kintál ektare 20 ba autoridade, nune’e uza ba área protejida,” José Neno Sila hateten ba Agência Tatoli liuhosi telefónika.

Jornalista : Abilio Elo Nini

 

Editór      : Cancio Ximenes

 

HAKEREK NO HATÁN

Please enter your comment!
Please enter your name here