Diretór Sentru Treinamentu Vokasionál Juventude Bairru-Pité Dili, Leonito Mendonça.Imajen/Tatoli Nelia Fernandes.

DILI, 10 agostu 2021 (TATOLI)-Sentru Treinamentu Vokasionál Juventude Bairru-Pité Dili, oras ne’e foti ona desizaun hodi adia formasaun ba formandu sira iha fulan-setembru tanba formandu barak seidauk kompleta vasina doze daruak ba prevensaun Covid-19.

Diretór Sentru Treinamentu Vokasionál Juventude Bairru-Pité Dili, Leonito Mendonça, informa iha fulan-jullu liubá simu ona sirkulár ida husi Sekretariu Estadu Formasaun Profesionál no Empregu (SEFOPE) no Ministériu Edukasaun Juventude no Desportu (MEJD) atu re-ativa ona formasaun ba formandu sira iha fulan-agostu 2021.

Notísia Relevante:STVJ Comoro sei reativa atividade formasaun

“Ami-nia formasaun ne’e sei hahú fali iha loron 06 fulan-setembru, tanbá hodi fó oportunidade ba formandu sira ne’ebé seidauk kompleta vasina ba segundu doze nian,” nia hateten ba Agência Tatoli, iha Manleuana, Dili.

Tuir dadus formandu hamutuk ema na’in 80, administrasaun iha ema na’in 51 no ospitalidade na’in 29 maka rejistu ona hodi tuir formasaun iha tinan 2021. Husi lista ne’e formandu barak maihosi munisípiu tanba ne’e sei adia data formasaun ba formandu sira atu trata sira-nia viajen fila mai Dili.

Bainhira atu hahú formasaun ne’e, nia dehan servisu administrasaun sei fó sai avizu ba públiku liuhosi pajina facebook ofisiál  no seluk tan.

“Bainhira hahú formasaun, ami nafatin kumpre regras husi Ministériu Saúde, hanesan fase liman ho sabaun, uza máskara, no halo distansiamentu sosiál,” nia hateten.

Sentru Formasaun ne’e funda husi Governu Noerwegia liuhosi projetu Norwegian Refugee Council (NRC) iha tinan 2008 no hetan ona akreditasaun husi Instituto Nacional de Desenvolvimento de Mão- de-Obra (INDMO) iha tinan 2012 ho ninia objetivu mak fó oportunidade ba joven sira ne’ebé la termina sira-nia estudu.

“Tanba, bazeia mós ba ita-nia krize 2016, entaun ho ida ne’e bele akumula joventude hodi tuir formasaun, ho nune’e bele redúz uituan konflitu iha ita-nia rai,” nia esplika.

Husi inisiu to’o tinan ne’e sentru formasaun ne’e prodús ona formandu hamutuk ema na’in 854, no husi númeru ne’e ema na’in 440 maka servisu ona instituisaun públiku Estadu Timor-Leste nian, kompañia privada no Organizasaun Naun Govermentál (ONG) iha rai-laran.

Entretantu, Sentru Treinamentu Vokasionál Juventude Bairru-Pité Dili, ho ninia  traballadór inklui formadór hamutuk ema na’in 10.

Notísia Relevante:La vasina, HADEZTA la autoriza formandu tuir formasaun

Jornalista : Nelia Fernandes

Editór       : Agapito dos Santos

HAKEREK NO HATÁN

Please enter your comment!
Please enter your name here