DILI, 09 agostu 2021 (TATOLI)—Sentru Treinamentu Vokasionál Juventude (STVJ) Comoro sei reativa atividade formasaun iha tempu badak tanba autoriza hosi Sekretaria Estadu Formasaun Profisionál no Empregu (SEFOPE).

Diretór Sentru Treinamentu Vokasionál Juventude (STVJ) Comoro, Norberto da Costa, informa, aban, SEFOPE sei halo abertura ba STVJ Comoro, nune’e sentru ne’e bele hahú atividade formasaun ba formandu sira iha 2021.

“Bainhira lockdown totál hosi marsu tama to’o agora, atividade paradu, nune’e foin lalais sirkulár hosi Governu liuhosi SEFOPE, sira fó mai sentru ne’e katak iha fulan agostu ne’e bele reativa ona prosesu aprendizajen, nune’e ami bele hahú ona formasaun ba klase hirak ne’ebé rejistu iha fevereiru nian,” Norberto da Costa, informa ba Agência Tatoli, iha nia kna’ar-fatin, Comoro, Dili, segunda ne’e.

Nune’e, nia informa, bainhira reativa formasaun ba formandu sira, sei fó sai informasaun liuhosi pájina STVJ Comoro, ho nune’e formandu sira bele fila-fali mai tuir formasaun maibé kontinua kumpre protokolu COVID-19 nian hanesan fase-liman beibeik ho sabaun, uza mascara no halo distansiamentu sosiál.

Totál formandu sira-ne’ebé tuir formasaun ba 2021 hamutuk na’in-90 iha área área administrasaun, custumer service, ospitalidade no sales force.

Sentru Treinamentu Vokasionál Juventude (STVJ) Comoro estabelese iha tinan 2008, no akreditada hosi Institutu Nasionál Dezenvolvimentu Mão de Obra (INDMO) iha tinan 2012.

Sentru formasaun refere funda hosi Norwegia Refuge Council (NRC) no Xefe Suku Comoro Eurico da Costa de Jesus, ho objetivu atu motiva no enkoraja ba joven sira, ho nune’e sira bele foka ba edukasaun hodi bele hadi’a sira-nia abilidade.

Totál formandu ne’ebé tuir ona formasaun iha (STVJ) Comoro hamutuk na’in-469. Hosi númeru ne’e ema na’in-94 mak hetan ona serbisu iha instituisaun Estadu, empreza no Organizasaun Naun Govermentál (NGO-sigla portugés).  Entretantu, totál funsionáriu no formadór iha (STVJ) Comoro hamutuk na’in-10.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here