Diretór sentru formasaun Haburas Dezenvolve Talentu (HADEZTA), Franciso de Araújo. Imajen Tatoli/Nelia Fernandes.

DILI, 06 agostu 2021 (TATOLI)-Sentru Formasaun Haburas Dezenvolve Talentu (HADEZTA) hahú re-ativa formasaun lían inglés, portugués, administrasaun, jornalizmu, no komputadór ba formandu sira ne’ebé maka simu ona vasina kompleta hodi prevene transmisaun surtu COVID-19.

Diretór HADEZTA, Francisco de Araújo, hateten nia parte komesa re-ativa ona formasaun ba partisipantes sira hahú iha loron 02 fulan-agostu 2021, maibé formandu no formadór sira tenke nafatin kumpre protokolu husi Ministériu Saúde no Organizasaun Mundiál Saúde maka uza máskara, garante distansiamentu sosiál no fiziku, uza hand sanitizer no seluk tan.

“Ami haree eskola sira hahú la’o ona, entaun ami mós hahú re-ativa ona formasaun ne’e, maibé ba formadór no formandu sira ne’ebé kompleta ona vasina mak ami autoriza sira tuir formasaun,” nia informa ba Agência Tatoli, via telefónika, ohin.

Kona-ba formandu no formadór sira ne’ebé seidauk simu vasina, nia esplika Sentru Formasaun HADEZTA la-autoriza sira atu partisipa kursu, maibé sujere atu sira bá simu vasina nune’e bele tuir formasaun iha semana hirak tuirmai.

“Ami fó informasaun ba sira, atu bainhira sira filafali mai tuir formasaun tenke uza máskara, no tenke iha mós kartaun vasina nian,” nia hateten.

Totál formandu  hamutuk ema na’in 200-resin maka antes ne’e  rejistu ona iha Sentru Formasaun HADEZTA ba tinan 2021 hodi tuir formasaun iha área lían inglés, portugués, administrasaun, jornalizmu, no komputadór.

Jornalista : Nelia Fernandes

Editór       : Agapito dos Santos

HAKEREK NO HATÁN

Please enter your comment!
Please enter your name here