Primeiru-Ministru, Taur Matan Ruak, prezide Retiru VIII Governu Konstitusionál, iha salaun Ministériu Finansa, Aitarak-laran, sesta (06/08). Imajen TATOLI/Egas Cristóvão

DILI, 06 agostu 2021 (TATOLI)–VIII Governu Konstitusionál realiza retiru ne’ebé lidera direta hosi Primeiru-Ministru, Taur Matan Ruak, hodi rona no analiza dezafiu implementasaun programa rekuperasaun infraestrutura no apoiu umanitáriu kauza dezastre naturál ne’ebé akontese iha 04 abríl.

“Reuniaun ne’e ho natureza diskusaun koordenasaun interna Governu, ne’ebé toka asuntu lubuk ida, liuliu problema no dezafiu hodi fó solusaun ne’ebé Governu hasoru, hanesan resposta ba rekuperasaun infraestrutura kauza dezastre naturál, apoiu umanitáriu no implementasaun subsídiu ba profisionál liña frente sira,” Ministru Prezidénsia Konsellu Ministru, Fidelis Manuel Leite Magalhães, hateten, liuhosi konferénsia impresa, iha edifísiu Ministériu Finansa, Aitarak-laran, sesta ne’e.

Tuir governante ne’e, prosesu hotu iha ona Konsellu Administrasaun Fundu Infraestrutura (KAFI).

Notísia relevante: KAFI deside rekupera imediata estrada no ponte iha fatin ualu

Enkuantu, kona-ba apoiu umanitáriu, Ministru husu Ministériu Administrasaun Estatál (MAE) no Sekretáriu Estadu Protesun Sivíl (SEPS) halo koordenasaun servisu di’ak hodi bele iha dadus, nune’e bele kanaliza apoiu ba vítima dezastre naturál ho di’ak.

“KAFI tenke halo deliberasaun iha tempu badak atu halo ajustamentu hodi halo rekuperasaun no apoiu umanitáriu sira, ne’ebé atu haree lei no kuadru legál saida mak impede inklui problema koodenasaun no lejizasaun sira ne’ebé impede implementasaun, presiza solusiona hodi halo implementasaun,” nia hatutan.

Nune’e, Governu prioritiza mellora prevensaun, jestaun no resposta ba rekupera infraestrutura kauza dezastre naturál, mellora enkuadramentu legál, koordenasaun no dezenvolvimentu institusionál atu iha kapasidade levantamentu dadus.

Entretantu, Ministériu Obra Públika no Ministériu Planu Ordenamentu, liuhosi ekipa task force identifika ona estragu infraestrutura kauza dezastre naturál iha territóriu tomak iha lokál 101 ho kustu estimasaun millaun $245.

Notísia relevante: Hahú aban, transporte bele asesu ona estrada Embaixada Japaun oin

KAFI deside atu rekupera imediata projetu ualu, ne’ebé estrada protokolu iha Embaixada Japaun nia oin finaliza ona no projetu seluk iha hela prosesu konkursu públiku iha Komisaun Nasionál Aprovizionamentu (CNA, sigla portugés).

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here