Primeiru-Ministru, Taur Matan Ruak, akompaña ho entidade relevante observa infraestrutura públika iha kapital Dili ne’ebé hetan estragu tanba inundasaun, iha estrada Bebonuk, tersa (06/04). Imajen TATOLI/António Gonçalves

DILI, 27 abríl 2021 (TATOLI)—Durante reuniaun Konsellu Administrasaun Fundu Infraestrutura (KAFI), deside rekupera imediata estrada no ponte iha fatin ualu ne’ebé hetan estragu maka’as hosi dezastre naturál ne’ebé akontese iha domingu (04/04).

“Ekipa téknika aprezenta progresu serbisu no halo levantamentu dadus estragu sira maibé seidauk hotu. Ami deside ona maizumenus pakote projetu ualu maka atu aselera halo rekuperasaun imediata. Hosi projetu ualu, ida mak empreza Montana Diak hahú halo ona rekuperasaun iha Embaixada Japaun nia oin,” Prezidente KAFI, José Maria dos Reis, relata hafoin ramata reuniaun iha salaun Ministériu Finansa, Aitarak-laran, tersa ne’e.

Fatin hirak ne’ebé sei halo rekuperasaun maka mota iha RTK-dirasaun Maloa bá Tuana-laran, estrada Bidau iha Hospital Nasional Guido Valadares (HNGV) nia kotuk, estrada ligasaun Tibar bá Ermera, Ponte Loes, Ponte Bekusi-Taibesi no estrada CPLP ba tasi ibun Bebonuk inklui estrada kotu ne’ebé rekupera daudaun iha Embaixada Japaun oin.

Notísia relevante: Governu indika Montana Diak hahú rekupera estrada Embaixada Japaun oin

Atuál Vise Primeiru-Ministru no Ministru Planu no Ordenamentu, haktuir, durante reuniaun KAFI, grupu tékniku sira aprezenta mós relatóriu dezeñu no Bill of Quantity (BoQ) hamutuk ho justifikasaun atu rekupera imediata tuir orientasaun Primeiru-Ministru, Taur Matan Ruak.

“Ita sei halo justifikasaun téknika atu haree loloos, bazeia ba relatóriu prelimináriu atubele hadi’a fatin ne’ebé hetan impaktu maka’as dezastre naturál. Kona-ba dadus, ekipa téknika sira sei kontinua iha munisípiu,” nia akresenta.

Iha  biban hanesan, Diretór Jerál Obra Públiku hosi Ministériu Obra Públika (MOP) no Koordenadór grupu tékniku, Rui Hernani, hateten, ekipa finaliza ona dezeñu no BoQ, atu halo rekuperasaun imediata iha fatin ualu.

“Ami halo ona ida (estrada iha Embaixada Japaun oin) no rua ami haruka ona ba Ajénsia Dezenvolvimentu Nasionál (ADN) atu halo halo verfikasaun, enkuantu haat seluk, iha semana ne’e ami finaliza ona prosesu no sei entrega ba ADN atu verifikasaun hafoin entrega ba Komisaun Nasionál Aprovizionamentu (CNA, sigla potugés) atu halo prosesu aprovizionamentu,” nia informa.

Tuir Responsável ne’e, kona-na prosesu rekuperasaun médiu no longu prazu, ekipa téknika sei halo identifikasaun.

Enkuantu, kona-ba serbisu limpeza no normalizasaun kuaze ramata ona no iha de’it empreza tolu mak sei estende loron balun tan atu halo normalizasaun, maibé sira seluk konklui ona serbisu.

Diretór Jerál mós dehan, ekipa sira ne’ebé atu destaka iha munisípiu seidauk konsege bá, maibé dadus prelimináriu ne’ebé iha ona, estragu infraestutura iha territóriu nasionál ho kustu millaun $200-resin.

“Ita hatene katak ho kondisaun Serka Sanitária iha Dili, bainhira atu dezloka sai bá munisípiu presiza halo teste swab no vasina, entaun ami forma kolega sira iha munisípiu atu halo identifikasaun,” nia akresenta.

Aleinde ne’e, MOP mós prepara ona ekipa haat atu tuun ba rejiaun haat, ne’ebé kada rejiaun kompostu hosi ema na’in-ualu atu profunda dadus ho númeru sertu, nu’udar baze halo planeamentu di’ak.

Jornalista: Florêncio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here