Forsa Unidade Territoriál; UPF ho F-FDTL hala’o operasaun intensivu iha liña fronteira Munisípiu Covalima. Imajen TATOLI/Eugénio Pereira.

DILI, 05 agostu 2021 (TATOLI)—Polísia Nasionál Timor-Leste (PNTL) liuhosi Unidade Patrullamentu Fronteira (UPF), kaptura tán timoroan na’in-hitu ne’ebé hakat fronteira terrestre ho ilegál, hodi tama ba Indonézia.

Komandante UPF, Superintendente Euclides Belo, hateten sidadaun hirak-ne’e UPF kaptura liuhosi operasaun postu Alfa ne’ebé destakadu iha fronteira terrestre Timor-Leste ho Indonézia.

Notísia relevante:Lere husu populasaun iha fronteira koopera ho seguransa

“Ohin dader ita nia membru sira hosi UPF kompañia Alfa postu Tunubibi kaer joven na’in-rua ho ojek no foin daudaun kaptura tán joven na’in-lima  inklui ema ida fasilita hodi tama iha área ponte Nunura, ne’ebé tenta ultrapasa fronteira ilegalmente ba Indonézia hodi sa’e sabuk,” Euclides Belo, hateten liuhosi komunikadu ne’ebé Agência Tatoli asesu, kinta ne’e.

Tuir identifikasaun polísia nian katak, ema hirak-ne’e hanesan membru arte marsiál ne’ebé hakarak atu ba tuir ezame iha Indonézia.

Tanba ne’e, hosi ema na’in-hitu  ne’e, na’in-rua entrega ona ba eskuadra PNTL Atabae no na’in-lima seluk entrega ona ba eskuadra PNTL Batugade, kontinua halo identifikasaun hela bainhira hotu sei entrega ba ekipa saúde  atu halo teste swab  no submete ba kuarentena.

UPF simu orientasaun hosi komandu  atu garante nafatin  seguransa iha liña fronteira, liu-liu Maliana, Suai to’o RAEOA.

Nia apela ba sidadaun hotu-hotu ne’ebé hela iha fronteira, atu halo kooperasaun di’ak ho PNTL, bainhira iha ema foun balun halo movimentu,  informa lalais ba parte seguransa.

Iha loron  hirak liu-bá UPF hamutuk ho Vise-Ministru Interiór, António Armindo mós kontinua sosializa informasaun ba populasaun iha liña fronteira, atu evita halo kontaktu ho komunidade hosi Indonézia.

Notísia relevante:Hakat ilegál iha fronteira, Governu sei aplika multa

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here