Vise-Ministru Interiór(MI), António Armindo. Imajen Tatoli/Francisco Sony.

BOBONARO, 03 agostu 2021 (TATOLI)—Vise-Ministru Interiór, António Armindo, hateten Governu sei aplika multa ba sidadaun ne’ebé mak hakat fronteira ilegalmente, iha periúdu COVID-19.

“Ita iha dekretu lei númeru 18/2021, ne’ebé prodús ona koima. Tamba ita aplika koima ba kualkér ema ne’ebé hakat fronteira ilegál,” Governante ne’e durante hala’o diálogu komuntária ho populasaun Tunubibi, iha kompaña Alfa postu Tunibibi,tersa ne’e.

Notísia relevante:Fulan lima, Alfándega Batugade hatama reseita $244.642

Dekretu ne’e tama ona iha Vigór, tanba ne’e koima ne’ebé sei aplika hosi $30 to’o $250, enkuantu daudaun ne’e aplika ona ba sidadaun na’in 14 ne’ebé autoridade imigrasaun Indonézia deporta mai, bainhira tama klandestinamente iha fronteira Saburai, atu ba sae sintu eis artemarsiál nian iha Atambua Indonézia.

Iha situasaun Estadu Emerjénsia ne’e Governu deside hasa’e tan valór koima $250 tanba aplika koima $30 númeru movimentu ilegál iha fronteira terrestre kontinua aumenta.

Sidadaun ne’ebé komete krime ruma, Governu sei entrega ba Ministériu Públiku nu’udár na’in ba kazu, sira ne’ebé hakat fronteira ilegál sei kumpre kuarentena durante loron 14, depois kontinua ba prosesu legál.

Nune’e mós Komandante Unidade Patrullamemtu Fronteira (UPF), Euclides Belo afirma, UPF sei halo seguransa ho rigorozu, atu minimiza atividade ilegál ne’ebé kontinua buras iha fronteira Terrestre entre Timor-Leste ho Indonézia.

Komandante ne’e mós husu ba lider organizasaun arte marsiál-sira, atu kontrola membru-sira, nune’e labele ultrapasa ho dalan ilegál, husu mós ba komunidade ne’ebé halo atividade ilegál, atu respeita soberania Timor-leste.

Governu iha ona polítika atu instala Pontu entrada ida iha aldeia Tunubibi, suku Tapo-Memu, daudaun ne’e finaliza ona ninia dezeñu no tempu badak sei loke tenderizasaun ba empreza ne’ebé atu konstrui obra ne’e.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here