UPF halo operasaun tama-sai ai-laran iha fronteira terrestres Bobonaro. Imajen Tatoli/Eugénio Pereira.

BOBONARO, 04 agostu 2021 (TATOLI)—Xefe Estadu Maiór, FALINTIL Forsa Defeza Timor Leste (F-FDTL), Tenente Jenerál, Lere Anan Timur, apela ba populasaun iha fronteira Bobonaro atu koopera ho autoridade seguransa, evita movimentu ilegál nune’e hamutuk prevene transmisaun COVID-19.

“Maluk-sira iha fronteira mak la koopera, ita sei la halo buat ida. Ohin loron Timoroan-sira hamutuk 600 iha Atambua, sira la’ós ba ho aviaun, maibé liuhosi rai-maran. Sira ne’ebé hela iha fronteira mak fasilita,” Lere Anan Timur, hato’o asuntu ne’e iha serimónia entrega fatin izolamentu COVID-19 iha aldeia Bilicou, suku Holsa, postu administrativu Maliana, munisípiu Bobonaro, kuarta ne’e.

Notísia relevante:Hakat ilegál iha fronteira, Governu sei aplika multa

Líder másimu instituisaun Defeza ne’e konsidera katak, durante ne’e movimentu ilegál iha fronteira Saburai no Batugade, membru grupu organizasaun arte marsiál ba Atambua-Indonézia makás liu.

Nune’e, husu ba autoridade lokál-sira atu kontrola no buka hatene populasaun Bobonaro ne’ebé fasilita movimentu Grupu hirak-ne’e, hodi bele submete ba prosesu investigasaun.

Nia husu mós ba Timoroan-sira ne’ebé iha hela Atambua atu entrega-an ba autoridade seguransa Indonézia, nune’e bele fasilita halo deportasaun tuir dalan legál, atu labele fó risku ba populasaun TL, tanba variante delta komesa aumenta makás iha Indonézia.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here