Deputadu Joaquim Dos Santos, Imajen Tatoli/Antonio Goncalves

DILI, 02 agostu 2021 (TATOLI)—Reprezentante Povu iha uma fukun Parlamentu Nasionál (PN) husu loke investigasaun ba implementasaun subsídiu propinas no pulsa ba estudante sira tanba estudante balun simu no balun la simu.

Membru Parlamentu Nasionál, Deputadu Joaquim dos Santos ‘Boraluli’, preokupa ho implementasaun subsídiu propinas no pulsa ba estudante sira tanba implementasaun ne’e hamosu dúvida.

Tanba tuir loloos governu liuhosi Ministériu Finansa (MF) no Ministériu Ensinu Superiór, Siénsia no Kultura (MESSK) implementa subsídiu ne’e tenke ho regra ezekusaun.

Notísia Relevante: PN husu Governu prosesa subsídiu propinas ba estudante sira

“Problema iha saida, ne’e Governu tenke haree, liu-liu MESSK tenke haree ba universidade sira simu ona ka seidauk tanba ne’e direitu ne’ebé Lei mak fó, ezekutivu tenke kumpri lei. Se Governu hatene universidade balun halo manobra entaun loke investigasaun tanba ita aprova semester rua durante pandemia COVID-19 ne’e,” Deputadu Joaquim dos Santos informa ba jornalista sira, iha uma fukun, segunda ne’e.

Nia haktuir, estudante sira hetan suspensaun durante fulan-rua ne’e Governu atu subsídia tanba kompromisu Governu nian ba estudante sira, nune’e Ministériu Finansa mós tenke haree tanba fatin balun dehan simu no fatin barak seidauk simu.

Atu halo kmaan inan-aman sira-nia responsabilidade, ne’e mak Governu husu ba Parlamentu Nasionál aprova hodi Governu subsídia semestre rua, kada semestre $150 no iha universidade balun liu $150 maibé subsídia de’it $150.

Maibé, nia dehan, to’o agora alunu barak la simu liu-liu Universidade Nacional Timor Lorosa’e (UNTL) ne’e, alunu sira selu tiha osan maibé ba husu fali universidade la fó fila, entaun Governu ezekuta osan ne’e la klaru.

“Ita hein orsamentu tuir mai parlamentu sei halo fiskalizasaun ba problema ne’e,” nia dehan.

Iha parte seluk, Deputadu Bankada FRETILIN ne’e konsidera implementasaun pulsa ba estudante sira la efetivu tanba despeza ne’ebé la fó retornu ba estadu.

“Ita la hatene persentajen hira mak estudante sira aproveita osan ne’ebé parlamentu aprova lori selu kompañia telekomunikasaun sira fó pulsa ba estudante sira, ne’e hatudu katak osan ita gasta sein efeitu. Ha’u uluk la konkorda fó pulsa ne’e, ita loke Wifi, alunu balun aproveita no balun la aproveita. Agora aproveitamentu ne’e tenke sukat persentajen ne’e,” nia hateten.

Iha fatin hanesan, Prezidente Komisaun G, Deputadu António Verdial de Sousa, husu Governu solusiona problema ne’e tanba orsamentu aprovadu no promulgadu.

“Ne’e importante atu Governu tau matan no komisaun sei halo relatóriu ida hodi haklaken iha plenária Parlamentu Nasionál. Ha’u mós konkorda loke investigasaun ba kestaun ne’e hodi buka hatene subsídiu ne’e fó duni benefísiu ba estudante sira ka lae,” Prezidente Komisaun G ne’e hateten.

Notísia Relevante: MESSK propoin millaun $19-resin ba ijensaun propinas no fornesimentu internete

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here