Plenaria Parlamentu Nasional. Imajen Tatoli Antonio Goncalves.

DILI, 12 jullu 2021 (TATOLI)—Reprezentante Povu iha uma fukun Parlamentu Nasionál (PN) husu Governu liuhosi Ministériu Ensinu Superiór, Siénsia no Kultura (MESSK) no Ministériu Finansa (MF) atu aselera subsídiu propinas ba estudante sira.

Membru Komisaun G ne’ebé trata asuntu edukasaun, juventude, kulutura no sidadania, Deputadu Gabriel Soares  husu  Governu prosesa  ona subsídiu propina ba  estudante universitáriu sira.

“Osan ita aprova tiha ona ba ita-nia oan sira iha universitáriu, maibé to’o ohin seidauk realiza. Estudante sira simu ona resivu pagamentu atu ba selu sira-nia semestre nian, nune’e sira ba check osan seidauk tama sira-nia konta bankária,” Deputadu Gabriel Soares, levanta liuhosi plenária, segunda ne’e.

Deputadu Bankada CNRT, fó-sai katak, oras ne’e dosente sira obriga estudante sira tenke ba selu sira propinas ba semestre nian.

“Ha’u husu Governu atu solusiona lalais asuntu ne’e, tanba estudante sira ohin balun ba ona simu resivu propinas nian,” nia fó hanoin.

Iha fatin hanesan, Prezidente Komisaun G, Deputadu António Verdial de Sousa, husu Governu solusiona problema ne’e tanba orsamentu aprovadu no promulgadu.

“Ne’e importante atu Governu tau matan no komisaun sei halo relatóriu ida hodi haklaken iha plenária Parlamentu Nasionál,” Prezidente Komisaun G ne’e hateten.

Hatan ba ne’e, Ministru ba Asuntu Parlamentár no Komunikasaun Sosiál (MAPKomS), Francisco Martins da Costa Pereira Jerónimo, hateten asuntu ne’e Governu halo ona koordenasaun ho universidade sira.

“Dokumentu hotu-hotu oras ne’e iha ona sekretariadu fundu COVID-19 ne’ebé mak iha Ministériu Finansa atu foti desizaun ikus hodi halo aprovasaun atu nune’e transfere ba universidade ida-idak.

Governante ne’e hateten, transferénsia subsídiu bazea ba kuantidade estudante sira-ne’ebé mak universidade sira aprezente mai iha governu.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here