Ministru Ensinu Superiór Siénsia no Kultura, Longuinhos dos Santos. Imajen TATOLI/Egas Cristóvão.

DILI, 12 abríl 2021 (TATOLI)—Ministériu Ensinu Superiór Siénsia no Kultura (MESSK), prevee ona millaun $19-resin atu fornese internete no ijensaun propínas ba universitáriu hosi Instituisaun Ensinu Superiór Públiku no Privadu (IESPP), durante periúdu serka sanitária.

Hosi item rua ne’e, MESSK aloka millaun $14 ba ijensaun propinas no millaun $5.4 ba fornesimentu liña internete.

Notísia relevante:Audiénsia públika ho komisaun G, MEJD propoin millaun $5-resin

Orsamentu ne’e, MESSK hasai 3% hosi orsamentu Sekretáriu Estadu Arte no Kultura (SEAK) ho hamutuk millaun $20, ne’ebé antes ne’e prevee ba programa peskiza uma-adat iha Munisípiu-sira maibé to’o agora la realiza tanba situasaun COVID-19.

Ministru Ensinu Superiór Siénsia no Kultura (MESSK), Longuinhos dos Santos, aprezenta ona orsamentu ne’e liu hosi proposta durante audiénsia públika ho Komisaun G Parlamentu Nasionál (PN), iha edifísiu ofisiál PPN Faról, segunda ne’e.

“Ba liña internete ita prevee miliaun $5.4, maibé ne’e mós ita fahe ba parte rua, miliaun $2.1 ba MESSK no millaun $3-resin ba MEJD. Kona-bá ijensaun propínas, ita prevee millaun $14, tanba sei apoia hotu estudante hosi IESPP,” Longuinhos dos Santos, hateten ba jornalista-sira, hafoin audiénsia.

Governante ne’e informa, fundu ne’e sei foti hosi Orsamentu Retifikativu (OR), tanba ne’e mak MESSK aprezenta proposta primeira alterasaun ba Lei Orsamentu Jerál Estadu (OJE) 2021, númeru 14/2020, 29 dezembru.

Nia esplika liu-tan, medida rua ne’e fortifika proposta hosi MESSK ba alterasaun, liuliu iha artigu 15 no 16, oinsá implementa ijensaun propínas no apoiu liña internete ba estudante-sira.

“Komisaun G laiha objesaun bainhira ita aprezenta proposta alterasaun, tanba sira kompreende ita-nia nesesidade. Tanba ne’e, sira prontu apoia ita atu realiza oferesimentu liña internete no ijensaun propínas ba estudante IESPP,” nia hateten.

Longuinhos dos Santos esklarese katak, ijensaun propínas ne’ebé MESSK sei apoia estudante IESPP ne’e jéral, signifika estudante hotu hosi IESPP sei hetan hotu direitu ba ida-ne’e.

“Razaun tanba iha pandémia COVID-19, hamosu defisiénsia ekonomia, inan-aman barak mak la asesu ba serbisu no rendimentu menus. Tanba ne’e, Governu desidi fó ba estudante hotu, laiha klasifikasaun,” nia subliña.

Nune’e mós Prezidenti Komisaun G Paralemtu Nasionál, deputadu António Verdiál hateten, hahú aban Komisaun komesa elabora proposta OR atu bele submete ba Komisau C trata asuntu finansa.

“Ohin ita halo audiénsia ikus ho MESSK, aban ita elabora proposta OR hodi bele submete ba Komisaun C atu aprezenta ba Prezidente Parlamentu Nasionál,” nia esklarese.

Antes ne’e ekipa Ministériu Edukasaun Joventude no Despotu (MEJD), hala’o audiénsia ho Komisaun G Parlamentu Nasionál, no aprezenta proposta orsamentu millaun $5-resin, atu bele asesu ba Orsamentu Retifikativu (OR), iha ámbitu COVID-19 no situasaun kalamidade.

Jornalista: Tomé Amado

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here